Уурхайчдын шүтээн “Эрдэнэ мандал” овоог тахиж, тайх тухай яриа гарч, улмаар тодорхой шийдвэр нь албажиж ажил ундарч байгаа тухай дууллаа. 2017 оны үед Ц.Даваацэрэн Захирлын шийдвэрээр хоёр жилд нэг удаа тахидаг Эрдэнэ мандал овоо, Долоон бурхан одыг тахиж байсан цаг саяхан мэт санагдсан. Овооны тахилга тодорхой дэг жаягтай, Долоон бурхан одны тахилга тахилгын сан судартай, ёс горимтой явагддаг. Тэртээ 17 дугаар зууны үеэс л Эрдэнэт уулын бэлээр, Баян-Өндөр хайрханы өврөөр зусдаг байсан өвөг дээдэс маань Эрдэнэ мандал овоог тахиж дараа нь найр наадам, цэнгэл үүсгэж байсан тухай мэдээ түүх, сурвалжид тэмдэглэгдэн үлдсэн байдаг. Ардын хувьсгалын дараа ч 1926, 27 оны үе хүртэл овоогоо тахиж байгаад цагийн эрхэнд хорионд орсон ч нутгийн уугуул иргэд далдуур, нууцаар Эрдэнэ мандал овоог тахиж ирсэн байдаг.

Уурхайчид тэр зан үйлийг энэ цагт үргэлжлүүлж этүгэн эх газартаа мөргөж, эцэг тэнгэрээ аргадан тахиж байгаа нь цаанаа учиртай. Газрын гүнд байгаа тэрхүү байгалийн баялгийг гарган ирж эх орноо хөгжүүлэх үйлсэд нэгэн үзүүрт сэтгэлээр зүтгэж байгаа уурхайчид газартайгаа амь нэгтэй байдаг бололтой.

Уул усаа аргадан тайтгаруулж, байгалийн тэрхүү баялгийг гагцхүү олны хэрэгцээнд зориулж буйгаа дуулган ийнхүү Эрдэнэ мандал овоог тахиж, эрдэнэт хүлгээ сэтэрлэн, идээ цагааныхаа дээдийг дээд тэнгэрт өргөж байгаа зан үйлийг энэ цагт Эрдэнэтийн уурхайчид нэр төртэй гүйцэтгэж байгаа.

Энэ жилийн хувьд Эрдэнэ мандал овооны тахилга, Долоон бурхан одны тахилга өөрийн дэг жаягийн дагуу болох ч түүнийг хүсэн хүлээсэн уурхайчид гэхээсээ илүүтэй эрдэнэтчүүд их байна. Сүүлийн хоёр жил дэлхий нийтийн хамарсан цар тахлаас үүдэн шашны зан үйл болох овоо тахилга бараг болоогүй. Одоо л цагийн аяс эргэж, газрын өнгө сэргэж байгаа үед уурхайчид Эрдэнэ мандал овоогоо тахих гэж байгаа нь цаг үеэ олсон ажил гэж бодном.