Монгол орныг гэлтгүй дэлхий нийтийг хамарсан цар тахлын хүнд хэцүү цагт  Орхон аймгийн Засаг дарга С.Батжаргалын санаачлагаар аравдугаар сарын 19-20-ны өдрүүдэд “Эрдэнэт хөгжил-2021” эдийн засгийн форумыг амжилттай зохион байгуулав. Форумд дэлхийн 15 улс орон, олон улсын байгууллагууд оролцож дэлхий нийт хоёр ч өдөр Эрдэнэтээр, “Эрдэнэт хөгжил 2021” форумаар амьсгалав. Манай аймгийн хувьд Монгол улсын Их хурал, Засгийн газраас баталсан “Алсын хараа 2050” урт хугацааны хөгжлийн бодлогын баримт бичиг,  Засгийн газрын 2020-2024 оны үйл ажиллагааны хөтөлбөр, Орхон аймаг, Эрдэнэт хотын “Ногоон тогтвортой хөгжлийн хэтийн зорилт”, “Орхон аймаг Эрдэнэт хотыг хөгжүүлэх таван жилийн үндсэн чиглэл” зэрэг баримт бичигт тулгуурлан зарим төсөл хөтөлбөрөө дэлгэлээ.

Цахим, танхим хэлбэрээр зохион байгуулсан форумд 1300 гаруй хүн оролцож саналаа хэлж, ухаан бодлоо уралдуулав. Эрдэнэт хотод болж байсан энэхүү форумын үеэрх хамгийн гайхалтай, чихэнд чимэгтэй мэдээллийг УИХ-ын гишүүн Д.Батлут дуулгах нь тэр. Тэрбээр “ Эрдэнэт хотод 3.5 тэрбум төгрөгийн улсын төсвийн хөрөнгө оруулалтаар Автовокзал барихаар боллоо” мэдээг дуулгасан нь энэ удаагийн форумд барьсан гэнэтийн бэлэг байв. Хотын хөгжилд, Эрдэнэтийн ирээдүйд яах аргагүй автовокзал нэн шаардлагатай байгаа.

Форумын үеэр Нутгийн удирдлагын ордны нэг давхарт “Зэс койн”-ы талаарх  танилцуулга, “Эрдэнэт үйлдвэр” аймаг, орон нутгийн үйлдвэрлэгчдээс авдаг бараа бүтээгдэхүүний танилцуулга зэрэг нь  олны анхаарлыг татаж байв. Форумыг зохион байгуулснаар Эрдэнэт хотын гэр хорооллыг орон сууцжуулах, Хог хаягдлын шинэ менежментийг бий болгож нутагшуулах, Аялал жуулчлалын хөгжлийг шинэ шатанд гаргах үйл явц нэг ч болтугай алхмаар урагшилсан гэхэд болно.

Үйлдвэр дагасан Эрдэнэт хот цаашдаа Ерөнхий төлөвлөгөөтэй, хэтийн зорилготой, рээдүйд чиглэсэн хөгжлийн чиг хандлагатай байхад форум өөрийн хувь нэмрээ оруулж амжилттай болж өнгөрлөө. Мөн  тодорхой нэр бүхий тодруулбал,  Орон нутгийн ЖДҮ эрхлэгчдийг чадавхижуулахад ХБНГУ-ын “GIZ прогресс” төсөл, Хог хаягдлын менежмент, нийтийн тээврийн салбарын хөгжүүлэлтэд НҮБ-ын Хөгжлийн хөтөлбөр хамтран ажиллахаа илэрхийллээ. Дотоодын хөрөнгө оруулагчдын хувьд “Мобиком корпораци” ЕБС-ын цахим сургалтын чадамжийг нэмэгдүүлэх чиглэлээр хамтран ажиллах болсон зэрэг ололт амжилтаар дүүрэн байлаа. Форумыг аймгийн ЗДТГ-ын хамт олон, Хөрөнгө оруулалт, хөгжлийн бодлогын хэлтсийнхэн сайн зохион байгуулсанд талархал илэрхийлье.