Баян-Өндөр хайрхан болон Тэнгэрийн долоон бурхан одны тахилгын ёслол тавдугаар сарын 30-31-ны өдөр болно. Тодруулбал, Тахилгын ёслол тавдугаар сарын 30-н буюу зуны тэргүүн сарын сайн өдрийн үдэш 19.00 цагаас Долоон бурхан одыг тахих ёслолоор эхэлнэ. Харин тавдугаар сарын 31-ний билэгт сайн өдөр өглөөний 06.00 цагаас Баян-Өндөр хайрханаа тахих аж. Баян-Өндөр хайрханы тахилгын үеэр лам хуврагууд ном хурах юм.

 Баян-Өндөр хайрханыг орон нутгийн хамгаалалтад авах шийдвэрийг анх 1998 онд тухайн үеийн ИТХ-аас гаргаж байжээ. Улмаар  2011 онд тухайн үеийн Засаг даргын шийдвэр гарч, жил бүрийн зуны эхэнд сард тахиж байхаар болсон байна.

 Монголчууд уул овоогоо тахиж лус, савдагаа баярлуулсаар ирсэн. Лус гэдэг усанд, савдаг гэдэг газарт, сахиус гэдэг тэнгэрт оршдог. Энэ хорвоогийн юм бүхэн амьтай.  Түүнчлэн мах сонгино, архи гэх элдвийн хорт муу үнэртний зүйл нь лус савдаг хилэгнэхэд хүргэдэг ажээ. Тийм учраас иргэд овоо тахих ёслолд ирэхдээ махан хоол идэхгүй байх, овоонд өргөх сүү, цайны дээжээ их хэмжээгээр биш бага хэмжээгээр бэлдэж, байгаль орчноо бохирдуулахгүй байх хэрэгтэй гэдгийг лам нар онцоллоо.