Орхон аймгийн “Иргэдийн санал хүсэлтийг хүлээн авах 7035-3511 утас”-нд иргэдээс ирүүлсэн санал хүсэлтийг долоо хоног бүр нэгтгэж, аймгийн Засаг даргын Шуурхай зөвлөгөөнд танилцуулдаг. Уг мэдээллийг Орхон аймгийн ЗДТГ-ын Erdenet.mn сайтад байршуулснаар хэн ч хаанаас ч харах боломжтой. Өөрт нь болон амьдран байгаа орчинд нь тулгамдсан асуудлаар иргэний үгээ хэлэх боломж болсон уг утасны мэдээллийг аймгийн Засаг даргын шуурхай дээр долоо хоног бүр уншиж танилцуулдаг.

Иргэдээс ямар санал хүсэлт ирсэн, гомдлыг нь хэрхэн барагдуулсныг дарга нарт биш иргэддээ цаг алдалгүй хүргэж баймаар. Учир нь Erdenet.mn сайтад долоо хоног бүр мэдээллийг тавих ёстой 7035-3511 тоот утасны мэдээлэл уг сайт дээр 2025 оны 3-р сарын 21-ний өдрөөс хойш тасарч, нэг ч үг бичээгүй байна. “Шинэчлэлийн Засгийн газар”-ын тэргүүн Норовын Алтанхуяг “Иргэний төв-1111” гэж нээж байсан. Энэ зөв санаачлага ажил хэрэг болж, “Иргэдийн санал хүсэлтийг хүлээн авах төв”-ийг манай аймагт байгуулж байсныг татан буулгаж, ганц утас үлдээсэн нь өнөөдөр амь нь арай л тасрах дөхжээ. Бусдын эхлүүлсэн зөв үйлийг унтраахгүй авч явах юм сан.