Эрдэнэт хотод “Эко” хорооллын бүтээн байгуулалтыг 2012-2016 оны хооронд хийж хэрэгжүүлсэн “Монгол Дайван” ХХК-ийг аймгийн ЗДТГ-ын Хууль эрх зүйн хэлтсээс эрэн сурвалжилж байгаа талаар мэдээлэл хийлээ. Учир нь тус хорооллын ажил бүрэн дуусаагүй, ялангуяа газар дорх инженерийн шугам сүлжээ, оршин суугчдын өмчлөлийн эрх зүй, үлдсэн газрын асуудал зэрэг яригдсаар өдий хүрсэн. Тиймээс тухайн хороололд байр сууц худалдан авсан иргэдийн эрхийг хамгаалах зорилгоор орон нутгийн удирдах байгууллагаас гэрээний дагуу үүргээ биелүүлэхийг компаниас шаардаж байдаг. Орхон аймаг 2018 онд дээрх асуудлыг шийдвэрлэхээр хийсэн гэрээгээ шинэчилсэн боловч өнөөдрийг хүртэл тус компаниас хариу өгөхгүй байгаа учир албан ёсоор эрэн сурвалжлахаар боллоо гэж албаны хүн ярьлаа.