Шинэхэн Ерөнхий сайд Гомбожавын Занданшатар “Эрдэнэт үйлдвэр”-ийн дагуул Оюутын зэсийн ордыг албан ёсоор зарлалаа. “Эрдэнэт хотын шинэ хөгжлийн гараа эхэллээ, шинэ үйлдвэр дагалдах дэд бүтэц гээд бүтээн байгуулатууд өрнөж, шинэ үеийн залуучуудын хөдөлмөрлөх шинэ талбар нээгдлээ” гэж Ерөнхий сайд нэг өгүүлбэрт дөрвөнтөө шинэ гэсэн үгийг онцолсон нь Эрдэнэтчүүдийг хошгоруулаад авах шиг болов. Зөвхөн Эрдэнэтийнхэнд хамаатай бус Монголын минь баялаг, ард нийтэд хүртээмжтэй байгаасай гэж хэн хүнгүй залбирах нь ойлгомжтой. Эрдэнэтийн овоо зэсийн ордоос 10 хүрэхгүй км-т байршилтай 350 гаруй сая тонн хүдрийн нөөцтэй, 1,1 сая зэсийн нөөцтэй хэмээн урьдчилан яригдсан Оюутын орд олон жил тогтвортой ажиллах нөхцлийг бүрдүүлсэн “Эрдэнэт үйлдвэр”-ийнхэнд баярлалаа гэж сэтгэгдлээ хэллээ. Эрдэнэтийн овооноос салбарласан Оюутын ордын геологи хайгуулын ажлыг арваад жилийн өмнөөс эхлүүлсэн төдийгүй өнөөдөр Г.Занданшатар Ерөнхий сайдын үед үйлдвэрлэлийн горимоор ажиллуулахаар эхлэх гэж байгаа нь энэ. Монголчууд байгалийн баялгаасаа юу хүртдэг вэ. “Улс орны эдийн засагт том боломжийг нээж байна” гэсэн даржин үгийг жижүүрийн мэт сонссоор иргэд өнөөдөр залхаад байгаа. “Эрдэнэт үйлдвэр”-ийн зэсийн ханш өсөхийн хэрээр ээлж дарааллаар цувардаг чемодантай намчдын халаас түнтийгээд буцацгаадаг нь үнэн. Эрдэнэтийн овоотой, зэстэй, баян Эрдэнэтчүүдэд энэ орд газрууд ямар хаялгатай вэ, тэд амьжиргааны хэт өндөр түвшин, хэрэглээний зардал, бараа бүтээгдэхүүн, үл хөдлөх хөрөнгийн өсөн нэмэгдэлд байнгын нэрвэгдэж байдаг. Металлын өндөр агууламжтай олон орд газар нээгдэхийн хэрээр оршин суугч иргэд эрүүл мэндийн хохирлыг амссаар байгаа нь нууц биш. Орхон аймгийн Засаг дарга Б.Зоригтбаяр Ерөнхий сайдаас АМНАТ-ын татварыг орон нутагт нь 10 хувийг үлдээж өгөхийг хүсэж байна. Одоогийн байдлаар дөрвөн хувийг нь үлдээж байгаа аж. Дэлхийд данстай “Эрдэнэт Үйлдвэр” жилд улсын төсөвт Ашигт малтмалын нэгдсэн албан татварт 800 орчим тэрбум төгрөг төлдөг. Энэ татвараас Орхон аймгийнханд жилд 4,2 тэрбум төгрөг ногддог. Хуулийн дагуу бол энэ татвар нэмэгдэх үндэслэлтэй аж. Аймгийн Засаг дарга түүний багийханд тавих иргэдийн албан бус хяналтанд АМНАТ-ын жил бүр олгож байгаа 4,2 тэрбум төгрөг тун хамаатай. Зөвхөн цагаан тоосны бүсийнхэн үйлдвэрээс хордоод байгаа юм биш, уул уурхайтай орон нутгийн оршин суугчдын эрхийг хамгаалахад тэдний идэвх санаачлага чухал байсаар ирсэн гэдгийг дэлхий нийтийн жишээ ч харуулдаг. Иймд ашигт малтмалын шинэ орд нэмэгдэхийн хэрээр оршин суугчдынх нь эрх ашиг дагаж хөндөгдөж байдаг гэдгийг иргэд Засгийн газарт сануулах эрхтэй.