Амарын талбайд өнөөдөр Баян-Өндөр сумын ЗДТГ-ын Нээлттэй хаалганы өдөрлөг боллоо. Өдөрлөгт Баян-Өндөр сумын ЗДТГ-ын ажилчид, Баян-Өндөр сумын 26 багийн Ажлын албаныхан болон  Соёлын төвүүдийн уран бүтээлчид ая дуугаа өргөж, иргэд оролцлоо.

Энэ үеэр Баян-Өндөр сумын Засаг дарга Б.Баасансүрэн хэлэхдээ “Аймгийн Засаг даргын захирамжийн дагуу Нээлттэй хаалганы өдрийг зохион байгуулж байна. Баян-Өндөр сумын хувьд иргэддээ ойр байж иргэдийнхээ дуу хоолой, санал хүсэлтийг хүлээн авахыг эн тэргүүний зорилтоо болгосон. Нэг өдөр ч гэсэн Амарын талбайд иргэдтэйгээ ойр байж иргэддээ хүрч ажиллаж байна. Иргэдийн хувьд газрын асуудлаар болон Баян-Өндөр сумын хөрөнгө оруулалтаар баригдаж буй 150 хүүхдийн цэцэрлэгийн барилгын талаар асууж байна. Энэхүү цэцэрлэгийн барилгын хувьд 150 хүүхдийн хүчин чадалтай. Бид барилгыг бариад ашиглалтад оруулаад мэргэжлийн байгууллага болох аймгийн Боловсрол, шинжлэх ухааны газарт хүлээлгэн өгнө. Тус газрынхан доторх тохижилт болон ширээ сандлын асуудлаа яамандаа тавих хэрэгтэй. Хамгийн гол нь цэцэрлэг ашиглалтад орсноор Эрдэнэтийн 30 иргэн тогтмол ажлын байртай болно. Газрын хувьд өргөдөл их байгаа. Хууль, тогтоомжийн дагуу олголт хийж байгаа. Энэ онд 180 гаруй иргэнд газар олгоод байна. Газар олголтод гарч буй гол хүндрэл нь Баян-Өндөр сумын хувьд 27 мянган га нутагтай. Иргэдийн хүлээж буй тэрхүү хүлээлтийг газар олголтын тал дээр үнэхээр хангаж чадахгүй байгаа нь үнэн. Ямар ч байсан боломжийн хэмжээнд асуудлыг шийдэж байгаа” гэлээ.

Энэ үеэр Баян-Өндөр сумын ЗДТГ-ынхан болон багуудын ажлын албаныхан иргэдэд хууль тогтоомжийн болон хог хаягдлаа хэрхэн ангилан ялгах талаарх мэдээллийн хуудас тарааж өгөв. Мөн иргэдээс үйл ажиллагааныхаа талаар санал авч байлаа.