Сэтгүүлч Д.Ганболд дөрвөн жил Орхон аймгийг удирдах анхны хуралдаан дээр төлөөлөгчийн хувьд Онц байлаа. АН-ынхан Хурлын даргын суудалд хүнээ томилох боломжоо алдсан ч дараагийн нүүдэл дээр хэлээ унжуулаад буугаад өгөлгүй, Засаг даргад нэрээ дэвшүүлэхийг зөвшөөрсөн нь Д.Ганболдын хувьд том зориг байв. Олонхийн 51,3 хувийн санал гэдэг дээсэн дөрөөн дээр дэнжигнээд чүү ай тогтох хэмжээний АН-ын хоёрхон хүнийг нэмж Засаг даргаар томилогдсон Б.Зоригтбаяр ч тэр  Д.Ганболд ч тэр тэдний үe иржээ. Дөч дөнгөж хүрсэн энэ хоёр залууд нэгд нь Засаг даргыг нь өгсөн юм бол нөгөөд нь орлогчийн суудлыг өгчихөөч дээ. МАН-ынхан хэтэрхий улайрч шуналгүй, ганц хүний зөрүүтэй өрсөлдөгчөө нэг удаа зөөлөн хараад Орлогчийн суудлыг АН-д үлдээвэл олон түмэн эрхий хуруугаа гозойлгоно шүү. Ирэх дөрвөн жил дангаар засаглах алтан боломж МАН-ынханд eрөөсөө байхгүй, байдал эвгүйтвэл Ардын намын гомдогсод ганцаар дутуу сөрөг хүчнийхэнтэй эвсээд залуухан, хөдөөний боловсон хүчнийг чинь багаар нь татаад унагахад асаалттай танк шиг хүржигнэсээр л байх болно. Д.Ганболд аймгийн Иргэдийн хурлын ганц чанга дуутай "хонх" нь, тэр хэзээ ч цөөнхийн өмнөөс дуугардаггүй, үг бүхэнд нь олон нийтийн эрх ашиг цохилсоор байдаг. МАН өмнөх найман жил шиг бүгдийг эзэгнэдэг үе өнгөрсөн болохоор ууртай, ааштай хуучин дарга нараа Орлогчоор томилохгүй шинэчлэлийн салхи оруулвал тун зөв сонголт болно. Намаар талцдагаа хойш тавиад зөв хүнийг зөв газарт нь нэг удаа ч гэсэн тавиад үзье. Сэтгүүлч Д.Ганболд улс төрд алдаа оноогоо дэнсэлж, ухаарч, хат сууж яваа шударга залуу шүү.