Төрийн байгууллагын анхан шатны нэгж бол баг юм. Өнөөдрийн Монгол улс, Орхон аймаг, Баян-Өндөр, Жаргалант сумын хөгжлийн эхлэл багаас эхтэй гэдэгт бид санал нийлдэг. Тэгвэл Баян-Өндөр, Жаргалант сумын 24 багийг хөгжүүлэх “Багийн хөгжлийг дэмжих дэд хөтөлбөр”-ийг манай аймаг анх удаа бусад орон нутгаас түрүүлж санаачлан эхний ажил хийгдэж эхлэв. Аймгийн ЗДТГ-аас “Багийн хөгжлийг дэмжих дэд хөтөлбөр”-ийг илүү үр дүнтэй, бүтээлч, амьдралд хүртээмжтэй болгон өргөжүүлэхийн тулд Орхон аймаг, “Эрдэнэт үйлдвэр”-тэй хамтран ажиллах гэрээнд нэгэн тусгай заалт болгон оруулж ажил хэрэг болгох  алхам хийлээ. Аймгийн ЗДТГ-ын Нутгийн удирдлагын ордны хурлын их танхимд “Орхон аймгийн Баян-Өндөр, Жаргалант сумын багууд Эрдэнэт үйлдвэр ХХК-ийн цех, нэгжүүдтэй шефийн холбоо тогтоох, хамтран ажиллах батламж гардуулах ёслолын ажиллагаа” боллоо. Ийнхүү манай аймгийн 24 багийн хөгжлийн төлөө Эрдэнэтийн уурхайчид хамтран зүтгэхээр болов. Өнөөдөр дээрх 24 багийн өмнө тулгамдаж буй олон асуудлыг шийдвэрлэхэд “Эрдэнэт үйлдвэр” компанийн томоохон цех, нэгжүүд хамтдаа гар, сэтгэл нийлэн ажиллах эрх зүйн орчин бүрдэж байгаа юм. “Батламж гардуулах ёслолын ажиллагааны нээлтэд аймгийн Засаг дарга Д.Батлут хэлэхдээ “Эрдэнэт үйлдвэр ХХК нь Орхон аймаг, Эрдэнэт хотын хөгжлийн төлөө иргэдийн өмнө тулгамдсан асуудлуудыг шийдвэрлэхийн төлөө олон ажлыг зохион байгуулж ирсэн. Цаашид ч бид хамтран бодитой ажлуудыг та бүхнийхээ дэмжлэгтэй хэрэгжүүлэхээр төлөвлөгөөндөө тусгаад байгаа. Өнөөдрөөс төрийн анхан шатны нэгж багуудаа Эрдэнэт үйлдвэрийн цех, хэсгүүдтэй шефийн холбоотой болгож байна. Сум, багийн Засаг дарга нар холбоо тогтоосон цех, нэгжүүдтэй хамтран иргэд, олон нийтийн эрх ашигт нийцсэн ажлуудыг зохион байгуулах болно. Та бидний хамтын ажиллагаа үр дүнд хүрнэ гэдэгт итгэлтэй байна” гэв. [sgmb id="1"][sgmb id="1"]