Уулын баяжуулах “Эрдэнэт” үйлдвэр, “Эрдэнэт” хотын бүтээн байгуулалтанд тэр үеийн ЗХУ-ын 15 Бүгд найрамдах улсын 172 хотын 43 үндэстэн, ястны төлөөлөл болох 15 мянга орчим ажилчин Монголд ирсэн байна. Мөн өндөр мэргэжлийн 500 гаруй инженер Эрдэнэтийн овооны энгэрт бүтээн байгуулалт хийхээр хүрэлцэн ирсэн аж. Манай улсын тухайн үеийн 18 аймаг хоёр хотоос 15 үндэстэн ястны төлөөлөл болох зургаан мянган иргэд Орос ах нартайгаа мөр зэрэгцэн ажилласан байна. Эхний ээлж болох 1974-1976 оны долоодугаар сар хүртэл 18-38 насны 1000 орчим залуучууд МХЗЭ-ийн илгээлтээр Эрдэнэтэд иржээ. 1974 оны наймдугаар сарын 12-нд Эрдэнэтийн бүтээн байгуулалтанд “МХЗЭ-ийн илгээлтээр залуучууд элсүүлэх тухай” БНМАУ-ын Сайд нарын Зөвлөлийн 304 тоот тогтоол гарчээ. Улмаар наймдугаар сарын 20-нд МХЗЭ-ийн илгээлт өвөртлөн Эрдэнэтэд очих анхны 54 залууг үдэх ёслолын цуглаан Залуучууд театрын өмнөх талбайд болж байжээ. Үүний дараа Эвлэлийн илгээлтээр орон нутгаас залуусыг элсүүлсэн байдаг. Тэдгээрийн дотор Арын сайхан хангай нутгаас 73, анхдагчдын өлгий Булганаас 63, Баян-Өлгийгөөс 46, Хонгор нутгаас 13. Отгонтэнгэрийн бэлээс 42, Өвөрхангай аймгаас 25, Говь-Алтайгаас 11, Хоймор нутаг Хөвсгөлөөс 45, Увс аймгаас 36, Төв аймгаас 19, Улаанбаатар хотоос 590, Найрамдлын Дархан хотоос 27 нийтдээ 990 хүн ирсэн хэмээн албан бичигт тэмдэглэгдэн үлджээ. [sgmb id="1"]