Жаргалант сумын төвд малын гоц халдварт шүлхий өвчин гарч хөл хорио цээрийн дэглэм тогтоогоод багагүй хугацаа өнгөрсөн. Хаврын тэргүүн сарын шинийн нэгэн буюу хоёрдугаар сарын 16-ны өглөө эхэлсэн энэхүү хорио цээрийн дэглэмийн улмаас манай аймгийн хөдөөгийн ганц сум болох Жаргалант гадаад ертөнцөөс тусгаарлагдаад байгаа. “Орсон бол гарч болохгүй, гарсан бол оруулахгүй”  шүлхийн хорио цээрийн дэглэм өнөө хэр дуусаагүй байгаа. Жаргалантын төвөөр дамжин өнгөрдөг улсын чанартай замаар тусгаарлагдсан сумын иргэд өнөөдөр Хойд, Өмнөд Солонгос шиг байдалд орчихсон, хорио цээрийн дэглэмд амьдарч байгаа. Сумын сургууль, цэцэрлэгийг хаасан. Шүлхийн голомтод байгаа өвчтэй малыг устгалд оруулж үлдсэнийг нь вакцинжуулж байгаа албан ёсны мэдээлэл хааяа нэг дуулддаг. Түүнээс биш тус сумын иргэдийн хүнсний хүрэлцээ хангамж, өндөр настай иргэд, жирэмсэн эмэгтэйчүүд, бага насны хүүхдүүд ямар байгаа талаар аймгийн удирдлагууд гэлтгүй иргэдэд ч ямар нэгэн мэдээлэл алга. Аймгийн Засаг даргын шуурхай зөвлөгөөнөөс Жаргалант сумтай холбоотой хамгийн сүүлийн үеийн мэдээллийг хайсан боловч “Хайлт илэрсэнгүй”. Баян-Өндөр сум, аймгийн ЗДТГ-ын хэлтэс, албадын дарга нар цаг үеийн ажлын талаар мэдээлэл хийдэг. Энэ удаад Жаргалант сумын талаар ган хийх ганц үг ч дуулдсангүй. Арга ч үгүй, тийшээ очсон хүн буцаж гарч чадахгүй учраас хэн тийш зүглэхийг хүсэхэв. Нэг үгээр хэлвэл, Жаргалантын иргэд хэрхэн амьдарч байгаа талаар ямар ч мэдээлэлгүй байна. Дарга нар хөдөөгийн ганц сум болох Жаргалантаа мартсан юм биш биз.           [sgmb id="1"]