Манай сайтын “Хотын амьдрал” буланд зургаадугаар сарын 27-нд “Нэг бүрийг нь 26 сая төгрөгөөр худалдан авчээ” мэдээлэл гарсан билээ. Манай сайтын сэтгүүлч Д.Пүрэвсүрэн нь мэдээлийг сайтар нягтлаагүйгээс Хот тохижуулах газрын дарга Р.Рагчаагийн нэр хүндэд халдсан ташаа мэдээлэл гаргасанд сайтын зүгээс аймгийн ИТХ-ын төлөөлөгч, тэргүүлэгч Р.Рагчаа даргаас хүлцэл өчиж байна. “Нэг бүрийг нь 26 сая төгрөгөөр худалдан авчээ” мэдээлэлд гарч байгаа 4 ширхэг автомашины талаар бид Баян-Өндөр сумаас тодруулсан юм. Баян-Өндөр сумын ЗДТГ-аас өгсөн мэдээллээр тодорхой нэр бүхий дөрвөн багийн иргэдээс хогны машинтай болох тухай хүсэлт гаргасан байна. Үүний дагуу Баян-Өндөр сумын ЗДТГ-аас багуудын иргэдийн дунд хэлэлцүүлэг зохион байгуулж, нэн тулгамдаж байгаа асуудлыг нь эрэмбэлсэний үндсэн дээр Орон нутгийн хөгжлийн сангаас санхүүжилтийг нь шийдвэрлэсний үндсэн дээр дөрвөн багийг хогны машинтай болгохоор шийдвэрлэжээ. Улмаар өнгөрөгч тавдугаар сард тендэр зарласны дагуу “Ээлт өгөөмөр” ХХК шалгарч нэг бүр нь 26 сая төгрөгний үнэтэй 4 машиныг Баян-Өндөр суманд хүлээлгэн өгөхөд бэлэн болсон байна.