Аймгийн хэмжээнд он гарсаар 112 гэмт хэрэг бүртгэгдсэн байна. Өмнөх оны мөн үеэс буурсан үзүүлэлт болжээ. 

Аймгийн Цагдаагийн газраас гэмт хэрэг буурсан шалтгааныг хорио цээрийн дэглэмтэй холбоотой гэж тайлбарлав. Гэвч нийт гэмт хэргийн гаралт буурсан ч согтуугаар үйлдэгдэх гэмт хэрэг буурахгүй байгааг цагдаагийн байгууллага онцоллоо.

Согтуугаар үйлдэгдэж байгаа гэмт хэрэг нь ихэвчлэн ахуйн хүрээний архидалтаас үүдэлтэй байна. Гуравдугаар сарын 1-нээс аймгийн Онцгой комисс, Засаг даргын захирамжаар архи согтууруулах ундаагаар үйлчлэх цэгүүдийн цагийн хуваарьт өөрчлөлт оруулж 22.00 цаг хүртэл сунгасан. Үүнтэй холбоотойгоор цагдаагийн байгууллагад ирж байгаа дуудлага, ачаалал эрс нэмэгдсэн ажээ. Хорио цээрийн дэглэмийн үед аймгийн Цагдаагийн газарт өдөрт дунджаар 50-60 дуудлага ирдэг байсан бол хөл хорио суларсанаас хойш 80-100 дуудлага болж нэмэгдсэн байна. Цагдаагийн газарт ирж байгаа нийт дуудлагын 80-90 хувийг согтуугийн дуудлага эзэлж байна.

Өнгөрөгч баяр, амралтын өдрөөр согтуугаар тээврийн хэрэгсэл жолоодсон 42 зөрчлийг илрүүлжээ. Аймгийн цагдаагийн газарт ирж байгаа дуудлага 100-110 болж нэмэгдэж ачаалал эрс ихэсчээ. Оны эхний хоёр сарын байдлаар 567 зөрчил бүртгэгдсэн. Үүний  415 нь согтуугаар үйлдэгдэх зөрчил байлаа хэмээн албаны хүн мэдээллээ.