Аймгийн Засаг даргын даваа гарагийн шуурхай зөвлөгөөнд Баян-Өндөр сумын удирдлага болох Б.Баасансүрэн дарга мэдээлэл хийсэн юм.  Түүний мэдээллээс харвал Баян-Өндөр сумын 651 өрхийн 57369 толгой мал байдаг аж. Эдгээрээс Жаргалант суманд 55 өрхийн 3645 толгой мал, Булган аймгийн Орхон суманд 108 өрхийн 10 мянган толгой мал, Бугат суманд 64 өрхийн 7456 толгой мал, Хангал суманд 32 өрхийн 4127 толгой мал, Сэлэнгэ суманд 16 өрхийн 1278 толгой мал, Булган аймгийн бусад суманд 76 өрхийн 1278  толгой мал оторлож байгаа аж. Мөн Сэлэнгэ аймгийн Баруунбүрэн болон бусад сумын нутагт 92 өрхийн 11203 толгой мал бусад аймаг сумдад 56 өрхийн 6247 толгой мал тус тус оторлож байгаа гэнэ. Зуны дэлгэр цагт ногооны сөл дагаж оторлох нь малчдын хувьд уламжлалт ажил нь. Харин Баян-Өндөр сумын зарим малчин тэр дундаа адуучид, үхэрчид нь Эрдэнэт хотын төвд зунжингаа малаа оторлуулсаныг Б.Баасансүрэн дарга тоолж үзсэн болов уу. Эрдэнэт хотын төвөөр сэлдийгээ унжуулсан азарга, ногоон байгууламж дээр хөрвөөсөн адуу, төв замаар явган зорчигч шиг л дураар “бэлчих” үхэр, адуу энэ зуны манай хотын дүр төрх байсан.

Баян-Өндөр сумын Засаг даргаар С.Ганцогт ажиллаж байхдаа хотын төвөөр бэлчих малтай харин ч сайн тэмцэж байсан. Хоёрын зэрэг мотоциклтой эргүүл ажиллуулна. Өнөөх эргүүлүүд нь хотын төвөөс мал хөөж тууж явахад нь замын цагдаагийнхан саатуулаад зогсоочихдог. Замын цагдаагийнхантай хурал зөвлөгөөн дээр ширүүхэн үздэг С.Ганцогт даргын дүр төрх Эрдэнэтэд үгүйлэгдээд байх шиг. Төрийн ажлын төлөө, Эрдэнэт хотын ногоон байгууламж, хотын өнгө үзэмжний төлөө дээлээ тайлаад ч үзэлцэхэд бэлэн явсан өмнөх даргын ажлыг Баян-Өндөрийн шинэ удирдлага үнэндээ нурааж байна. Ширүүн, усархаг борооны дараа “Бид ингэж ажиллаж байна” хэмээн сошиал ертөнцөд нэг их ажил хийсэн болж зургаа оруулах нь иргэдэд үнэндээ таалагддаггүй. Б.Баасансүрэн дарга түүний орлогч хоёр хотын төвөөр бэлчих үхэр, адуугаа явган тууж байвал ажил хийж байна гэж харахаас өөр ойлголт алга. 

Б.Баасансүрэн даргын хийсэн хэдэн тоог нэмж хасъя. Баян-Өндөр суманд 651 малчин өрх байдаг, тэд 57369 мал тоолуулжээ. Дээрх аймаг, сумын нутагт оторлож байгаа малчин өрхийг нэмээд үзтэл 499 гарч байна. Үүнийг 651-ээс хасаад үзтэл 152 гэсэн тоо гарч байна. Өөрөөр хэлбэл, өнгөрсөн зун Баян-Өндөр сумын 152 малчин өрх малаа Эрдэнэт хотын төвд оторлуулсан байх нь. Малыг тоог нь гаргаад үзтэл отор хийж байгаа 499 өрх 45234 толгой малтайтайгаа хүний газарт яваа бололтой. Харин үлдсэн 152 өрхийн 12 мянга 135 толгой мал яах аргагүй Эрдэнэт хотын төвд эрдэнэтчүүдтэй хамт өнгөрөгч зун оторлосон ажээ. Эсвэл Б.Баасансүрэн даргын мэргэжил боловсрол Баян-Өндөр сумын 651мал бүхий өрхийн 57369 толгой мал дотроо эргэлдээд байна уу. Үгүй бол мэргэжилтнүүд нь ажлаа дутуу хийчихэв үү.

Яах аргагүй өнгөрсөн зун, өнөөдөр ч гэлтгүй хотын төвд хаа сайгүй бэлчих малын дүр зураг захаас аваад бий. Нэг хэсэг Баян-Өндөр сум мал бүхий айл, өрхийг хотоос нүүлгэнэ гэж баахан шуугисан. Малчин баг байгуулсан. Малтай иргэд Малчин багаа бараадна. Малчны хороолол байгуулна гээд хэсэгтээ шоудсан. Ойрмогхоны хоёр сонгуулиас айгаад өнөөх малтай өрх, мал малчиндаа хайр зарлаад ажлаа умартсан уу.

Ямар ч байсан Б.Баасансүрэн дарга энэ удаад хотын төвд оторлосон малаа хөөж тууж гаргах  нь бүү хэл тоолж ч үзээгүй юм шиг байна. Хотын захирагчийн алба, Хот тохижуулахынхан л хотын төвөөр бэлчих малтай “ажилладаг” ажил үүргийн хуваарьтай нь биш байх. Баян-Өндөр сумын 22 баг, байшин дотор суух хэдэн зуун төрийн болон төрийн үйлчилгээний ажилчдаа гаргаад ч болтугай Эрдэнэтийн төвөөр бэлчих адуу малаа хөөж туусангүй. Хүн нь малтайгаа зэрэгцэж алхсан, бэлчсэн, оторлосон өнгөрсөн зуны дүр намаржингаа үргэлжлэх үү.  Баян-Өндөр сумын дарга, түүний орлогч нар ажлаа хийж мэдэхгүй байна уу хийхгүй сууна уу гэдгийг асуух дээд шатны удирдлага манай аймагт бий  гэдэгт итгэх эсэх нь эргэлзээ төрүүлж эхэллээ.