Аймгийн ЗДТГ-аас нэг сарын хугацаатай “Соёлыг түгээе” аяныг орон нутгийн хэмжээнд зарлаад байгаа билээ. Энэ аяны хүрээнд “Төрийн байгууллагын соёл, төрийн албан хаагчдын харилцаа, хандлага, ёс зүй” сургалтыг төрийн албан хаагчдын дунд зохион байгуулав. Сургалтын чиглүүлэгчээр аймгийн Засаг даргын орлогч, “Соёлыг түгээе” аяныг зохион байгуулах Ажлын хэсгийн ахлагч А.Түвшинжаргал ажиллаж, илтгэгчээр Удирдлагын академийн төрийн албаны сургуулийн Удирдлага, сэтгэл зүйн тэнхимийн багш доктор, профессор Ч.Санжмятав, Удирдлагын академийн Төрийн албаны сургуулийн Удирдлага, сэтгэл зүйн тэнхимийн багш доктор, дэд профессор Б.Хэрлэн нар хичээл заалаа.

Төрийн албаныхны харилцаа, хандлагыг өөрчлөх, төрийн байгууллагын соёлыг түгээх, төрийн албан хаагчдын харилцаа, хандлага, ёс зүйг өөрчлөх зорилготой энэхүү сургалтад Орхон аймгийн төрийн байгууллагын ажилтнууд 25 танхимаас зэрэг холбогдон 180 байгууллагын 500 гаруй хүн хамрагдлаа.

             Төрийн албаны тухай хууль болон бусад хууль тогтоомжид төрийн албан хаагчийн ёс зүй, харилцааны соёлын талаар нарийвчлан заасан хэдий ч энэ удаагийн сургалтаар төрийн албан хаагчид хандлагаа хэрхэн өөрчлөх, ёс зүйгээ дээшлүүлэхэд чухал санаа өгсөн, гарц шийдлийг энгийн жишээн дээр тайлбарласнаар үр өгөөжтэй байсан талаар оролцогчид өгүүлж байлаа. Ийнхүү манай аймгийн төрийн албан хаагчид харилцаа, хандлагаа өөрчилж “Соёлыг түгээе” аянд нэгдлээ.