Аймгийн ИТХ-ын Тэргүүлэгчдийн ээлжит хуралдаанд “Аймгийн хэмжээнд 2022 онд иргэдэд гэр бүлийн хэрэгцээний зориулалтаар үнэгүй өмчлүүлэх газрын байршил, хэмжээ тогтоох тухай” асуудлыг Газрын харилцаа, барилга, хот байгуулалтын газрын дарга Д.Цолмон танилцууллаа. Монгол улсын иргэнд газар өмчлүүлэх тухай хууль 2002 оны зургаадугаар сарын 27-нд батлагдаж 2003 оны тавдугаар сарын 1-ний өдрөөс эхлэн даган мөрдөж ирсэн. Энэ хугацаанд Орхон аймгийн хэмжээнд нийтдээ 23278 иргэний газар өмчлөх хүсэлт гаргасан өргөдлийг хүлээн авч 21154 иргэнд 1642.42 га газар өмчлүүлжээ. Энэ нь өргөдөл гаргасан иргэдийн 90.6 хувьтай тэнцэж байгаа аж.

Аймгийн хэмжээнд 2021 онд 54.9 га газрыг 713 иргэнд өмчлүүлжээ. Эдгээр иргэн нь газар өмчилж авах хүсэлт, өргөдлөө 2012 онд өгсөн ажээ. Өнөөдрийн байдлаар мэргэжлийн байгууллагын зүгээс 2012 онд өргөдлөө өгсөн иргэдийн газар өмчлөх асуудлыг бүрэн шийдэж дуусаагүй байна.

ГХБХБ-ын газраас 2022 онд аймгийн хэмжээнд 583 иргэнд 45.2 га газрыг өмчлүүлэхээр төлөвлөсөн байна.