Баян-Өндөр сумын Засаг дарга Б.Баасансүрэнтэй холбогдох гээд 9072-5555 тоот  утас руу дуудлага хийтэл “Холбогдох боломжгүй байна” гэх хариу өглөө. Хэвлэл мэдээллийн ажилтан н.Золзаяа гэгчтэй холбогдон Баасансүрэн даргын утсыг асуулаа. Гэтэл өөдөөс “Ямар асуудлаар уулзах гэж байгаа юм бэ. Уулзах бол надаар дамжуулж байж уулзана. Баасансүрэн даргын утсыг өгөх боломжгүй. Ямар асуудлаар яах гэж уулзах тухайгаа надад дуулгаж байж, би мэдсэнээр Баасансүрэн даргад танилцуулна. Түүний дараа л уулзана даа” гэж байна.

Хэвлэлийнхэн гэлтгүй Баян-Өндөр сумын иргэн бид ямар цаг үед, ямар нийгэмд амьдраад байна аа. Хэвлэл мэдээллийн байгууллагын сэтгүүлч ч гэсэн Баян-Өндөр сумын иргэн юм шүү. Баян-Өндөр сумын жирийн иргэн яагаад сумынхаа Засаг даргын утасны дугаарыг мэдэж болохгүй цаг үед амьдраад байгаа юм бэ. Эсвэл Баян-Өндөр сумын МАН-ын гишүүд л Баасансүрэн даргатай уулзах эрхтэй, сөрөг хүчнийхэн, болон гишүүн биш сул иргэд даргатай харьцах эрхгүй гээд байрныхаа үүдэнд зар тавьчих, найзууд аа.

Сумын Засаг даргын хэвлэлийн ажилтан гэж ер нь ямар хүн байдаг вэ. Хэвлэлийн хагас хугас ч гэсэн эрх чөлөөг минь хясан боогдуулдаг, сумын Засаг даргаас асуух асуулт ч тавих эрхгүй байдал хүргэх гээд байгааг чинь ойлгохгүй байна. Улс төрийн намуудын сонгууль болохоор штабт нь очиж ажиллачихаад маргааш нь нэг их том дүртэй, намын нүүртэй сэтгүүлчид дарга нарын дэргэд очсоноо юу гэж бодоод байна вэ.

Эсвэл Баасансүрэн даргын хувь хувьсгалын хамаг л нууц хийгээд  ажил төрлийг мэддэг, өмнөөс нь зааж зааварладаг бол сумын Засаг даргаар яах юм бэ, Хэвлэл мэдээллийн ажилтан н.Золзаяа гэдэг “дарга сэтгүүлч” ээ. Дарга даамлуудыг нь шүүмжилж, бодит байдлыг нь гаргаж тавихлаар “Нэг сая төгрөгөөр гэрээ хийе. Манай мөнгө их жаахан л даа” гэж урдуур хойгуур гүйх, хүнээр үг дайх нь энэ тэр чинь өнөө цагийн дарга нарын цүнх баригч хийгээд дагалдагчдын нүүр царай биш шүү. Төрийн ажил нээлттэй ил тод байх ёстой. Эрдэнэтчүүдийн, Баян-Өндөрчүүдийн мэдэх эрхийн төлөө, мэдээлэл авахын төлөө хэвлэлийнхэн Баасансүрэн даргын түмнээсээ нуудаг утасны дугаарыг асуусан болохоос хувийн амьдрал руу нь өнгийх гээгүй. Нөгөөтэйгүүр Б.Баасансүрэн дарга аа, та утасныхаа дугаарыг сумынхаа 100 гаруй мянган иргэнээс нуугаад байх шаардлагагүй. Таны утасны дугаарыг мэддэг 100 ч хүрэхгүй хүн байгаа болов уу. Харин 100 мянган эрдэнэтчүүд мэдмээр байна. Монгол улсад мөрдөгдөж байгаа ямар нэг хуульд “Баян-Өндөр сумын Засаг дарга Баасансүрэнгийн гар утасны дугаар нууцын зэрэглэлтэй байна” гэж заагаагүй шүү.