Иргэдээс аймгийн ЗДТГ-ын 70353511 тоот утсанд ирдэг гомдол, саналын багагүй хувийг  нийтийн тээвэр, хот хоорондын тээврийн дайвар ачаатай холбоотой асуудал эзэлдэг. Улаанбаатараас иргэн хот хоорондын таксинд мөнгөө төлөөд дайвар илгээдэг. Гэтэл Эрдэнэтэд хүлээн авагч нь 2-5 мянган төгрөг нэмж төлж бараагаа хүлээн авдаг асуудал иргэдийг багагүй бухимдуулдаг. Баян-Өндөр сумын Засаг даргаас  Барилгачдын талбайд тээш хадгалалтын үйлчилгээ эрхлэх хоёр мухлаг байршуулсан. Нэг нь “Эрдэнэт арслан” ХХК-ийнх бол нөгөө нь хувь хүнийх. Өнөөдөр хуралдсан аймгийн Засаг даргын шуурхайд ч тээш хүргэлт, хадгалалттай холбоотой гомдол ирсэн. Үүнийг цэгцлэх, нэг талд нь шийдэх үүргийг Засаг дарга С.Батжаргал Баян-Өндөр сумын удирдлагад өглөө.

Баян-Өндөр сумын Засаг дарга Б.Баасансүрэн “Тээш хадгалалт, хүргэлтийн үйлчилгээний зөвшөөрлийн хугацаа арванхоёрдугаар сарын 1-нд дуусна. Цаашид дахин сунгахгүй. Хот хоорондын жолооч дайвар ачааг гараас гарт хүргэнэ” хэмээн мэдэгдлээ.