УИХ-ын гурван гишүүн барилга барьж, төрийнхнийг жижигрүүлж байна

Эрдэнэт хотод өнгөрсөн зунаас орон сууцны барилгууд эрчимтэй барьж эхэлсэн. Газар тэнгэр, гол усны гоё нэртэй барилга угсралтын ажил энд тэндгүй өрнөж байгаа. Хамгийн сүүлийн мэдээллээр Эрдэнэт хотын хэмжээнд 19 орон сууцны барилга баригдаж байна. Тэдгээрийн 15-аас доошгүй нь хууль тогтоомж зөрчсөн, барилга барих тусгай зөвшөөрөлгүй, барилгын экспертизээ батлуулаагүй ажиллаж байгааг албаны хүмүүс хүлээн зөвшөөрч байна. Дээрх 19 барилгын 3-4 орон сууцны ард өнөөгийн УИХ-ын гурван гишүүн “нууц ноёд”-оор сууж байдаг аж. Эрхэм гишүүд төрийнхөнийг дарамталж, хууль зөрчиж байгааг албаныхан нуухгүй байна.

Яагаад гэнэт манай аймагт орон сууцны барилга барих ажил бүтээн байгуулалт болтлоо хөгжсөний шалтгаан нь иргэд, жижиг дунд бизнес эрхлэгчдэд олдоод байдаггүй  жилийн гурван хувийн хүүтэй зээл юм байна. Засаг төрөөс бизнесийг дэмжих, Ажлын байрыг хадгалах хэмээн нэрлэж 2-3 их наяд төгрөгөөр хэмжигдээд байсан 3 хувийн хүүтэй зээл дүрээ нуугаад барилгын салбарт орж ирсэн бололтой. Тэрхүү 3 хувийн хүүтэй, 3 жилийн хугацаатай зээлийг эхний 12 сард зөвхөн хүүг нь төлөөд үлдсэн 24 сард үндсэн зээлээ хуваагаад төлөх нөхцлийг эрх мэдэлтнүүд овжиноор ашиглаж байгаа бололтой. Өөрөөр хэлбэл, нэг жилийн хугацаанд зээлийнхээ үндсэн төлбөрөөс чөлөөлүүлнэ. Дарга нар, албан тушаалтнуудаас бүрдсэн “барилгачдын арми” авсан зээлээрээ энэ жил барилгаа босгож аваад ирэх жилийн өдийд ашиглалтад оруулаад зах зээлд нийлүүлнэ. Ингэж албан тушаалтнууд жилийн 3 хувийн хүүтэй зээлийн үр шимийг жинхэнэ утгаар нь хүртэж байна.

Харин тэд манай аймгийн мэргэжлийн байгууллагынханыг  шаардлага тавихад нохой хуцсан чинээ санадаггүй, дарамталж, даапаалдаг, заримыг нь жижигрүүлдэг гэнэ. Манай аймгийн хяналтын байгууллагынхан энэ асуудалд анхаарахгүй, мэдээгүй, хараагүй сонсоогүй дүртэй гурван сармагчин шиг дундыг бариад л суусаар байх уу. Харин аймгийн Засаг дарга С.Батжаргалын хувьд “Баригдаж буй барилгуудад хяналт тавих явдал муу байна. Барилга барьж байгаа нь сайн хэрэг ч төрийн зүгээс тавих хяналт муу байна. Энэ тал дээр анхаарах хэрэгтэй” гэж хоёр ч удаа анхааруулаад байна.