Аймгийн Засаг даргын даваа гарагийн шуурхай Нутгийн удирдлагын ордны Хурлын их танхимд болоо. Энэ удаад байгууллагын дарга нар шуурхайд өөрийн биеэр оролцоцгоов. Шуурхайг аймгийн Засаг даргын орлогч А.Түвшинжаргал удирдан явуулсан юм. Цар тахлын улмаас өмнөх шуурхайнууд хоёр ч оныг дамжин цахимаар, цахим-танхим хосолсон хэлбэрээр явж ирсэн. Ковидын эриний өмнөх 2020 оны эхний улирлаас хойш шуурхайд цуглараагүй дарга нар энэ удаад хурлын танхимыг дүүргэж байлаа.

Олон дарга шинээр “төрсөн” юм байна. Таньж мэдэх гэхээсээ илүүтэй эрдэнэтчүүдийн хувьд ч шинэ дүр төрх нэлээн хэд харагдсан. Олон дарга төрж, шуурхайд суух албан тушаалтны тоо нэмэгдэхийн хэрээр хэвлэл мэдээллийнхэн суух суудалгүй, цонхны тавцан, шатны гишгүүр дээр, бүр зарим нь босоогоороо ажлаа хийлээ.

Аймгийн Засаг даргын шуурхайн үеэр Орлогч дарга М.Түмэнжаргал “Нийтийн тээврийн парк шинэчлэлтийн хүрээнд манай аймаг 12 автобус шинээр авч байгаа. Иргэдээс ирсэн санал хүсэлт, сургуулийн хичээл танхимаар орж буйтай холбоотойгоор Вокзалын чиглэлд нэг автобус явуулж байгаа. Ачаалал их болоод шаардлага гарвал дахин автобус нэмж болно. Нийтийн тээврийнхэн асуудлаа судлаарай. Иргэдийг, зорчигчдыг хохироож болохгүй” хэмээн анхаарууллаа.