“Ногоон Эрдэнэт” зөвлөгөөнд оролцсон аймгийн ИТХ-ын дарга Д.Мөнхбатын мэндчилгээг бүрэн эхээр нь хүргэж байна

“Ногоон Эрдэнэт” зөвлөгөөнийг хамтарч зохион байгуулж буй болон  үнэтэй санал санаачилга, зөвлөгөө өгөхөөр хүрэлцэн ирсэн УИХ, Засгийн газрын гишүүд, Ерөнхийлөгчийн Тамгын Газар, төр болон хувийн хэшлийн байгууллагын төлөөлөл, эрдэмтэн судлаачид, Орхон аймгийн иргэдийн төлөөлөл та бүхэндээ аймгийн ИТХ-ын байгууллагын өмнөөс мэндчилгээ дэвшүүлж зөвлөгөөний үйл ажиллагаанд амжилт хүсье.

Монгол Улсын Ерөнхийлөгч Ухнаагийн Хүрэлсүх Эх дэлхий, байгаль орчноо хайрлан, түүнтэй зохицон амьдрах монгол уламжлал, зан заншлаа эрхэмлэн, дэлхийн уур амьсгалын өөрчлөлтийн нөлөөлийг бууруулах, эко системийн тэнцвэрт байдлыг хадгалах, ой усны нөөцийг хамгаалж нэмэгдүүлэх зорилгоор “Тэрбум мод” үндэсний хөдөлгөөнийг НҮБ-ын хүндэт индэр дээрээс санаачлан өрнүүлсэн нь Монголын төдийгүй төв, зүүн Азийн тогтвортой хөгжлийг хангахад чиглэсэн глобаль бодлого болсоон гэж хэлж болно. Ерөнхийлөгчийн санаачилгыг Засгийн газар бүх ард нийтээрээ дэмжин хүлээн авч “Тэрбум мод” тарих ажлын төлөвлөлт, зохион байгуулалт, хяналт, үр дүнгийн асуудлаарх  бэлтгэл ажил орон даяар ид өрнөж байна.

“Тэрбум мод” үндэсний хөдөлгөөний хүрээнд  манай Орхон аймагт 20.0 сая мод тарьж ургуулан байгалийн унаган төрхийг сэргээн, экологийн тэнцвэрт байдлыг хадгалан, уур амьсгалын өөрчлөлтийн нөлөөллийг бууруулж, ойжуулалт, ойн нөхөн сэргээлт, таримал ой байгуулахад иргэд, олон нийтийн оролцоог дэмжиж нэг хүнд ноогдох ногоон байгууламжийн хэмжээг 18.0м2-д хүргэж, агаарын чанарыг сайжруулж, иргэдийн эрүүл аюулгүй, тав тухтай орчинд амьдрах нөхцөлийг бүрдүүлэх зорилгоор аймгийн ИТХ-ын Ээлжит VII хуралдааны 02 дугаар тогтоолоор “Ногоон Эрдэнэт” хөтөлбөрийг 2030 он хүртэл 2 үе шаттайгаар хэрэгжүүлэхээр баталсан. 

      Уг хөтөлбөрийн хэрэгжилтийг хангах, танин мэдүүлэх, идэвх оролцоог нэмэгдүүлэхэд өнөөдрийн хэлэлцүүлэг ихээхэн ач холбогдолтой. Зөвлөгөөнд “Ногоон Эрдэнэт” хөтөлбөрийг хэрэгжүүлэх олон талын байгууллагууд оролцож байгаад талархаж байна. Ялангуяа өнөөдрийн хэлэлцүүлэгт Байгаль, орчин аялал жуулчлалын яамны удирдлага өндөр ач холбогдол өгч оролцож байгаад бид ихэд олзуурхаж байна. Орхон аймгийн хувьд нэг км.кв талбайд 115 хүн ногддог ба энэ нь улсын дунджаас хүн амын нягтралаараа 59.4, хангайн бүсийн дунджаас 78 дахин их, нийт айл өрхийн 61 хувь нь гэр хорооллын багуудад амьдарч байгаа  зэрэг нь агаар болон хөрсний бохирдлын гол нөхцөл шалтгаан болж байна.

Мөн “Эрдэнэт үйлдвэр” ТӨҮГ-ын Хаягдлын аж ахуйгаас үүсэж буй цагаан тоос нь орон нутгийн иргэдийн сэтгэлийг зовоосон асуудлын нэг хэвээр байна. Дэлхийн дулааралтай холбоотой Орхон аймгийн агаарын дундаж температур 1973-2021 оны хооронд 1.8 градусаар дулаарч, хур тунадасны хэмжээ, эрчимшил, төрөл нь өөрчлөгдөж, улмаар байгалийн аюултай үзэгдлийн давтамж нэмэгдэж байгаа нь Та бид энэ асуудалд анхаарал хандуулах зүй ёсны шаардлага гарч ирсэний илрэл юм.  Ногоон хөгжлийн бодлого, үйл ажиллагааны үр дүнг өөрийн байгууллагынхаа үйл ажиллагааны нэн тэргүүн шалгуур үзүүлэлтийн нэг болгож ажиллахыг бүх байгууллагын удирдлагуудад уриалж байна. Хүн бүрийн чин сэтгэл шингэж асар их хүчин чармайлт, хөрөнгө мөнгөөр бий болсон мод бут, ногоон байгууламжаа алхам тутамдаа нүдний цөцгий мэт хайрлан хамгаалж байхыг Эрдэнэтчүүд Та бүхэндээ уриалж байна аа.

Зөвхөн нэг хэсэг нь л хийх биш нийтээрээ гар бие оролцон хийх замаар ажиллацгаая !!!

Зөвлөгөөнөөс гарах санал санаачилга, гэрээ хэлэлцээрүүд үр дүнтэй байхын ерөөл өргөж Зөвөлгөөний үйл ажиллагаанд амжилт хүсье!!!