Монгол улсын Их хурлын гишүүн Н.Алтанхуяг, Д.Батлут, “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн нар Орхон аймагт үйл ажиллагаа эрхэлдэг жижиг, дунд үйлдвэрээр зочилж, байдалтай газар дээр нь танилцах аялал хийсэн юм. Эхнийх нь тээрмийн бөөрөнцгийн “ОРА металл” компани байлаа. Эднийх жилдээ 8000 тонн тээрмийн бөөрөнцөг үйлдвэрлэх хүчин чадалтай. 2021 онд 3907 тонн бөөрөнцөг үйлдвэрлэж 16 тэрбум төгрөгийн борлуулалтын орлоготой ажиллажээ. Улс, орон нутгийн татварт 2021 онд 1 тэрбум 740 гаруй саа төгрөг төвлөрүүлжээ.

Тус үйлдвэрийн ТУЗ-ийн дарга бөгөөд Ерөнхий захирал С.Бат-Эрдэнэ:  “Өнөөдөр үйлчилж байгаа Тендэрийн хууль төрийн байгууллагад л ашигтай байдаг. Төр талаас нь харж хийсэн учраас тэр байх. Чанар, стандарт хангаж буй бүтээгдэхүүн үйлдвэрлэж байгаа аж ахуйн нэгжид Тендэрийн хууль ашиггүй байна. Манайх Оюутолгой, Эрдэнэт үйлдвэрт бүтээгдэхүүнээ нийлүүлдэг. Оюутолгой компани Монголын зарим аж ахуйн нэгжтэй “2+1” нөхцөлтэй гэрээ байгуулдаг. Олон улсын ISO болон бусад чанар, стандарт хангасан, гэрээний үүргээ чанд биелүүлдэг аж ахуйн нэгжтэй 2 жилийн гэрээ байгуулаад түүнийгээ хангалттай гэж дүгнэвэл шууд 1 жилээр сунгаад явчихдаг. Энэ л бидэнд хэрэгтэй байна. Оюутолгойд нийлүүлдэг бүтээгдэхүүнээ бид өөрсдөө хүргэж өгдөг. Тээрмийн бөөрөнцгийн шуудайгаа эндээ оёдог. Нэг тоннын даацтай. Эрдэнэт үйлдвэртэй бид Тендэрийн хуулийн хүрээнд тендэр зарлахад нь л оролцож байна.

УИХ-ын эрхэм гишүүд та бүхэн Тендэрийн хуульд өөрчлөлт оруулах тохиолдолд “2+1” нөхцөлтэй гэрээг судалж үзээрэй. Үнэхээр энэ гэрээ үйлдвэрлэгчдэд боломж олгодог юм шүү. Бараг 3 жилийн гэрээ байгуулчихвал хөрөнгө оруулалтаа татах, шинэ техник технологи нэвтрүүлэх гээд хийх ажил байна. Ажлын байр нэмэгдүүлэхэд ч чухал. 2019 онд манайх 208 ажилтантай байлаа. Энэ жил 148 хүн ажиллаж байна. Бид олон улсын чанарын менежментийн ISO 9001-2015 тогтолцоо, болон Хөдөлмөрийн аюулгүй байдал, эрүүл ахуйн тогтолцоо ISO 5001-2018 стандартыг компанидаа хэрэгжүүлэн ажилладаг.  Нэг үгээр хэлбэл, бид дэлхийн баталгааг хэрэглэгчиддээ өгч чадна. Харин Тендэрийн хууль бас бусад хууль тогтоомж бидэнд саад болж байна. Цар тахлын үед нөхцөл байдал хүнд байсан ч манай хамт олон 2021 онд Монгол улсын үндэсний MNS6907:2021 “Тээрмийн хоромоор сайжруулсан, цутгамал ширмэн бөөрөнцөг-Техникийн шаардлага” стандартыг мөрдөж ажиллаж байна.” хэмээсэн юм.

 УИХ-ын гишүүн Н.Алтанхуяг, Д.Батлут, Ерөнхйи захирал Х.Бадамсүрэн нар Орхон аймгийн хэмжээнд жижиг, дунд үйлдвэрлэл эрхэлж байгаа аж ахуйн нэгжүүдээр орж танилцахад үйлдвэрийн Баяжуулах фабрикийн удирдлага болон Хөрөнгө оруулалт худалдан авах ажиллагааны бодлогын газрын дарга болон бусад албаны хүмүүс дагалдан явсан юм.

УИХ-аас Тендэрийн тухай хуульд өөрчлөлт оруулахаар болсон. Жижиг, дудн үйлдвэрлэгчдийн хувьд Тендэрийн хууль үнэхээр тээг садаа болж байдаг, зарим тохиолдолд. Хуулийн шинэчилсэн найруулгад саналаа тусгах, ЖДҮ  эрхлэгчдийн эрх ашгийг хамгаалахын тулд ийнхүү  төрийн түшээд үйлдвэрлэгчидтэй танилцаж байна. “Эрдэнэт үйлдвэр” ТӨҮГ-ын хувьд “Тендэрийн хууль” бусад хууль тогтоомжид заасны дагуу жилд 3 тэрбум төгрөгийн шууд худалдан авалт хийдэг нь орон нутгийн, дотоодын үйлдвэрлэгчдээ бодлогоор дэмжихэд зарим тохиолдолд хуулийн хязгаарлалтад ордог байна. Ихэнхдээ Тендэрийн хуулийн дагуу тендэр зарлаж байгаа нь Эрдэнэтийн дотоодын үйлдвэрлэгчдэд хүндрэлтэй байдалд хүргэдэг ажээ.