Монгол орон даяар зохион байгуулах эрт илрүүлэг, урьдчилан сэргийлэх үзлэг, оношилгоо 2022 оны тавдугаар сарын 1-нээс 2023 оны дөрөвдүгээр сарын 31 хүртэл үргэлжилнэ. Дээрх хугацаанд иргэдийн амьдран буй баг, сумаас үзлэг оношлогоонд хамрагдах иргэдэд утсаар, болон шуудангаар урилга илгээх аж. Иргэдийн үзлэг, оношлогоонд хамрагдах урилгад хуваарийн дагуу багц шинжилгээ өгөхөөс эхлээд эмчийн үзлэгт хамрагдах хуваарийг нарийн гаргаж өгөх гэнэ.  

Өөрөөр хэлбэл, урилга ирсэн, товлосон өдөртөө очиж шинжилгээнд хамрагдах ёстой ажээ. Улсын хэмжээнд явагдах эрт илрүүлгийн үзлэгээр үүссэн “BIG DATA”-г хадгалж архаг өвчин илэрсэн тохиолдолд хяналтад авч, хүндрэхээс сэргийлэх ажилд ашиглах гэнэ. Монгол улсын хэмжээнд эрэгтэйчүүдийн дундаж наслалт 66.7 эмэгтэйчүүдийнх 76.2 байдаг аж. Зөрүү нь 9.5 жил байна. Амьсгалын тогтолцоо, хоол боловсруулах эрхтэний тогтолцоо, шээс бэлгийн тогтолцоо, зүрх судасны тогтолцоо, гэмтэл хордлого ба гадны шалтгаант өвчлөл  улсын хэмжээнд эхний 5-д эрэмблэгддэг байна. Мөн зүрх судас, хавдар, гэмтэл хордлого, хоол боловсруулах эрхтэний тогтолцоо,амьсгалын замын тогтолцоо зэрэг нь нас баралтын тэргүүлэх 5 шалтгаанд орж байна.

Орхон аймгийн хэмжээнд 2021 оны арванхоёрдугаар сарын байдлаар 106 мянга 145 иргэн бүртгэлтэй байна. Жаргалант сумын 3 багт 3511 иргэн үүнээс эрэгтэй 1844, эмэгтэй 1667 иргэн үзлэг оношлогоонд хамрагдана. Харин Баян-Өндөр сумын хэмжээнд 102 634 иргэн үзлэгт хамрагдах ба үүний 50299 нь эрэгтэй, 52335 нь эмэгтэйчүүд байна.  Эрт илрүүлэгийн үзлэгийг Өрхийн эрүүл мэндийн төвүүд, сумын эрүүл мэндийн төв, БОЭТ, “Эрдэнэт медикал”, “Баян-Өндөр мед”, “Эрдэнэт сувилал”-д хийх ажээ.

Хүүхдүүд Анхан шатлалын үзлэгт хамрагдах бол насанд хүрэгчид Лавлагаа шатлалын түвшинд эрт илрүүлэгийн үзлэг, оношлогоо хйилгэнэ. Иргэн таньд эрт илрүүлэгт хамрагдах урилга ирсэн тохиолдолд  ӨЭМТ-д очно. Тэнд та Хөтөчид хандана. Цахим бүртгэлд бүргүүлнэ, Эрсдэлийн үнэлгээ хийлгэнэ, Лабораторийн шинжилгээ өгнө, Багажийн шинжилгээ өгнө, дараа нь Эмчийн дүгнэлт зөвлөгөө гаргуулах юм байна. Улаан хоолой, ходоод, бүдүүн шулуун гэдэс дурандахад 1 хүнд дунджаар 40-50 минут зарцуулах тул дурантай багцийн шинжилгээнд хүлээлт үүсэх учраас өдөрт 10-12 иргэн хамрагдах талаар зохион байгуулагчид анхааруулж байна.