Орон нутгийн өмчид бүртгэлтэй ашиглагдахгүй байгаа барилга байгууламжийг үзэж судлан дүгнэлт гаргах ажлын хэсэг өнөөдөр Засаг даргын зөвлөлийн хуралд дүгнэлтээ танилцууллаа. Ажлын хэсгийг Засаг даргын орлогч А.Түвшинжаргал ахалж байгаа бөгөөд мэргэжлийн байгууллагууд болох “Эрдэнэт Ус” ДТС ОНӨК, “Эрдэнэтийн ДЦС” ТӨХК, ГХБХБГ, ОНӨГ зэрэг мэргэжлийн байгууллагуудын дарга, инженерүүд ажлын хэсэгт ажиллаж байгаа юм. 
      Аймгийн хэмжээнд нийт орон нутгийн өмчид бүртгэлтэй, ашиглагдахгүй байгаа 16 барилга байгууламж байна. Үүнд: “Нийцэл” ӨЭМТ-ийн хуучин байр, “Энхжих мандариваа” ӨЭМТ-ийн хуучин байр, Их залуу багийн конторын барилга, “Мөнхсүндрэл” ӨЭМТ-ийн хуучин байр, Говилын халуун усны байр, Эрдэнэ багийн хуучин барилга зэрэг 16 обьектууд орж байна. 

       Ажлын хэсгийн дүгнэлтээр эдгээрээс 4 барилгын газар нь ИШС-нд холбогдох боломжтой тул барилгыг актлаж, газар дээр нь 8-9 давхар орон сууц барих боломжтой гэж үзжээ. 
Мөн “Учралт баяр” ӨЭМТ-ийн хуучин байр, Рашаант багийн хуучин байр, Наран, Цагаанчулуут багийн хуучин байр, 18 дугаар цэцэрлэгийн хуучин барилга зэрэг дөрвөн байршилд одоо явуулж байгаа үйл ажиллагааг хэвээр үлдээхээр шийдвэрлэжээ. Учир нь эдгээр газруудад хувийн хэвшлийн байгууллагууд түрээсийн журмаар үйл ажиллагаа явуулж байгаа юм. 
      Харин үлдсэн байршлуудад дуудлага худалдаа явуулж худалдан борлуулах саналыг тус тус танилцуулсан юм.Ингэснээр аймгийн ИТХ-ын хуралдаанаар хэлэлцэн эцэслэн батлахаар ажлын хэсгийн саналыг Засаг даргын зөвлөлийн гишүүд дэмжлээ.