Аймгийн 2022-2037 он хүртэлх газар зохион байгуулалтын ерөнхий төлөвлөгөөний гүйцэтгэлийн талаар ГХБХБГ-ын дарга Г.Цолмон Засаг даргын зөвлөлийн хуралд танилцууллаа. 
       Тэрээр: “Манай аймгийн хувьд газар нутаг багатай, том уурхай дагасан хот учир хотын төлөвлөлт зайлшгүй уурхайн хөгжилтэйгөө уялдаж явах шаардлагатай. Хамгийн сүүлд 2005 онд батлагдсан газар зохион байгуулалтын ерөнхий төлөвлөгөө нь тухайн үеийн үйлдвэрт ашиглаж байсан технологийн онцлогоос хамаараад суурьшлын бүс үүсгэх боломжгүй гэх ангиллаар нэлээдгүй газрууд хот байгуулалтын баримт бичигт хамрагдахгүй үлддэг байсан. 
       Харин одоо бол цаашид өөрчлөгдөх боломжтой технологийн норм дүрэмд уялдуулан суурьшлын бүсийг ямар хэмжээнд нэмэгдүүлж болох, мөн суурьшлын бүсийн ашиглалтын хэлбэр нь аль хэсэгтээ ямар байвал үр дүнтэй байх вэ гэдэг судалгааг энэ удаагийн төлөвлөгөөгөөр гаргаж ирэх боломжтой болж байгаа юм. 
        Энэхүү судалгааны ажлын тайланд тусгагдсанаар Баян-Өндөр сумын нутаг дэвсгэр дээр өмнө нь суурьшлын бүс үүсгэхэд тохиромжгүй ангилалд ордог байсан талбайгаас 4000 орчим га газар нь шинээр суурьшлын бүс үүсгэхэд боломжтой гэсэн талбайд нэмэгдэж орж байгаа” гэв. 
        Ерөнхий төлөвлөгөөг боловсруулах гүйцэтгэгчээр газар зохион байгуулалт болон бусад үйл ажиллагаа эрхлэх тусгай зөвшөөрөл бүхий “Land owner” ХХК шалгарсан бөгөөд судалгааны ажлын бүрэлдэхүүнд зөвлөх инженерүүд, доктор, профессорууд орж ажиллаж байгаа ажээ.
      Аймаг, нийслэлийн газар зохион байгуулалтын ерөнхий төлөвлөгөө нь “Газрын тухай” хуулийн 25.2-т буюу Улсын газар зохион байгуулалтын ерөнхий төлөвлөгөөнд заасан хүрээнд боловсрогдсон 12-16 жилийн хугацаанд хэрэгжүүлэх зураг төслийн баримт бичиг байдаг. 
      Түүнчлэн газар зохион байгуулалтын ерөнхий төлөвлөгөө гэдэг нь тухайн орон нутаг өөрийнхөө батлагдсан хилийн цэс доторх газраа хамгийн ашигтайгаар ашиглах суурь нөхцөлөө гаргадаг, судалгааны үр дүнд суурилсан урт хугацааны төлөвлөлтийн баримт бичиг гэдгийг онцолж байна.