2022-2023 оны хичээлийн шинэ жилийн нээлт эхлэхэд хэдхэн хоног үлдлээ. Энэ хичээлийн жилийн хувьд 2022 оны долоодугаар сарын 11-нд гарсан Монгол улсын Ерөнхийлөгч У.Хүрэлсүхийн “Их эзэн богд Чингис хааны эш хөргийг залах тухай” зарлигийг хэрэгжүүлэхээс эхлэх юм байна.  “Монгол Улсын Үндсэн хуулийн Гучин дөрөвдүгээр зүйлийн 1 дэх хэсэг, Монгол Улсын Ерөнхийлөгчийн тухай хуулийн 9 дүгээр зүйлийн 1 дэх хэсгийг тус тус үндэслэн ЗАРЛИГ болгох нь:

Нэг. Эзэн Богд Чингис хааны эш хөргийг монгол төр эрхэмлэн дээдэлж, Төрийн ордонд залсугай.

Хоёр. Төрийн бүх байгууллага, Монгол Улсаас хилийн чанадад суугаа дипломат төлөөлөгчийн газар, бүх шатны сургалтын байгууллагууд Эзэн Богд Чингис хааны эш хөргийг дээдлэн залсугай.

Гурав. Монгол хүн, айл өрх бүр Эзэн Богд Чингис хааны эш хөргийг эрхэмлэн залж, дээдлэн шүтэж байхыг уриалсугай.

Дөрөв. Монгол хүн бүр Их Монгол Улсын гал голомтыг сахиж буйгаа гүнээ ухамсарлан, Эзэн Богд Чингис хааны суу алдар, үйл хэрэг, билиг сургаалыг эрхэмлэн дээдэлж, даган мөрдөж, төрт ёсны үнэт зүйл, өв соёлыг үр хойчдоо өвлүүлэн үлдээж, эе эеэ сахин бататгаж, улс орноо мандуулахад хувь нэмрээ оруулахыг уриалсугай” гэжээ.

Энэ ажлын хүрээнд есдүгээр сарын 1-ний хичээлийн шинэ жилийн нээлтэд Чингис хааны эш хөргийг сургуулиуд хүндэтгэлтэйгээр залах гэнэ. Чингис хааны эш хөргийг захиалан авч ирэх ажлыг мэргэжлийн байгууллага хариуцан ажиллаж байгаа аж. Мөн  энэ өдөр Монгол улсын Ерөнхийлөгч У.Хүрэлсүхийн зарлигийг тусгайлан томилогдсон хүмүүс сургууль бүр дээр уншиж танилцуулах агаад аймгийн ИТХ-ын төлөөлөгчид, аймаг, орон нутгийн удирдлагууд есдүгээр сарын 1-ний хичээлийн шинэ жилийн эхний хичээлийг Чингис хааны түүх, Их Монгол улсын түүхтэй холбоотой сэдвээр заах гэнэ. Боловсрол, шинжлэх ухааны газраас хичээлийн шинэ жилийн нээлтийн бэлтгэл ажлыг хангахаар мэргэжлийн байгууллагуудтай хамтран ажиллаж байна. Эш хөрөг гэдэг нь анхны буюу үндсэн хөрөг гэсэн үг ажээ.