УИХ-ын гишүүн С.Ганбаатар өөрийн сонгогдсон тойрог болох Орхон аймгийн Боловсролын салбарыг дэмжин 2022 оны улсын төсөвт 3 тэрбум төгрөг суулгасан. Аймаг, орон нутгийн боловсролын салбарын багш нараар дамжуулан сурагчид, тэдний эцэг эхэд ч хүртээмжтэй, ач холөогдолтой байх энэхүү хөрөнгө оруулалтын үр дүнд 1.8 тэрбум төгрөгийн өртөг бүхий сургууль, цэцэрлэгийн багш нарын хичээл, сургалтын хэрэглэгдэхүүн болох таблет, зөөврийн компьютерийг хүлээлгэн өглөө.

Аймгийн хэмжээний ЕБС-ын 1135 багшид таблет, Сургуулийн өмнөх боловсролын 425 багшид зөөврийн компьютер, 24 сургуульд тест уншигч машиныг нийлүүлсэн нь чухал ач холбогдолтой ажил болсон хэмээн аймгийн Боловсррол, шинжлэх ухааны газрын мэргэжилтнүүд онцолж байв. Тэр дундаа ахлах ангийн сурагчдаас шалгалт авахад  тестийн материалаа засах нь их цаг гарзаддаг, шалгуулагч үр дүнгээ тодорхой хугацаанд хүлээдэг байв. Тэгвэл аймгийн хэмжээний 24 сургууль бүгд тест уншигч машинтай болсноор 3-5 минутын дотор бүх шалгуулагчийн тестийг засах боломж бүрдэж байгаа юм.

Энэ үеэр УИХ-ын гишүүн С.Ганбаатар “Орхон аймгийн ЕБС-ийн 1135 багш таблеттай болсон. Цэцэрлэгийн 425  багш зөөврийн компьютертэй болж байна. Багш нараас санал авахад хамгийн түрүүнд таблет, зөөврийн компьютер  шаардлагатай байна хэмээсний дагуу нийлүүлж байгаа. Аймаг, орон нутгаас Худалдан авах ажиллагааг зохион байгуулсан. Миний хувьд ганцхан шаардлага л тавьсан. Энэхүү улсын төсвийн хөрөнгөөр нийлүүлэгдэх таблет, зөөврийн компьютер нь 2021 оноос хойш үйлдвэрлэсэн байх гэдгийг л чухалчилсан. Орхон аймгийн боловсролын салбарт хийгдэж буй энэхүү улсын төсвийн хөрөнгө оруулалт нь багш нараар дамжин хүүхдүүдэд ач холбогдлоо өгөх юм” хэмээлээ.

Манай аймгийн ИТХ-ын 35 төлөөлөгч тангарагаа өргөснийхөө дараахан л татвар төлөгчдийн мөнгөөр “Ажил албанд амин чухал шаардлагатай байна. Таблетгүй бол Иргэдийн төлөө, сонгогдсон тойргийнхоо төлөө ажиллах боломжгүй байна” гэсээр бүгд өнпөр үнэтэй таблеттай болж байсан цаг саяхан. Тэгвэл ЕБС-ийн 14 дүгээр сургууль л гэхэд 104 багштай, тэд өнөөг хүртэл хичээлдээ таблет ашиглах боломжгүй байлаа. Тэдний 98 нь ийнхүү таблетыг хичээлдээ ашиглах боломжийг УИХ-ын гишүүн С.Ганбаатар олгож байна. Ингэснээр 21 аймгаас анх удаа Орхон аймгийн багш нарт 1.8 тэрбум төгрөгийн таблет, зөөврийн компьютертэй болж байна.  Орхон аймгийн ЕБС-ийн багш нар анх удаагаа  таблеттай, СӨБ-ийн багш нар зөөврийн компьютертэй болов.