“Иргэдийн оролцоо-Төлөөлөгчийн манлайл-Төрийн үйлчилгээ” өдөрлөг Баян-Өндөр сумын Спорт зааланд арваннэгдүгээр сарын 23-нд болсон. Энэ үеэр аймгийн ИТХ-ын дарга Д.Мөнхбатаас “Нээлттэй хаалганы өдөрлөг”-ийн талаар  тодруулга авлаа.

-Аймгийн Иргэдийн хурлаас  “Иргэдийн оролцоо-Төлөөлөгчийн манлайлал-Төрийн үйлчилгээ” нэгдсэн өдөрлөгийг зохион байгуулж байна. Энэ өдөрлөгийн онцлог нь юу байсан бэ?

- Аймгийн ИТХ-ын 8 дахь удаагийн бүрэн эрх хэрэгжиж байна. Ковид, цар тахалтай үед иргэдтэйгээ уулзах боломжгүй, дэглэм сахиж байсан. Энэ удаад жилийн эцэс болж байгаатай холбогдуулан хоёр жилийн хугацаанд аймгийн Иргэдийн хурлаас гарсан бодлого, шийдвэрийг иргэдэд сурталчлах, төрийн байгууллагуудын үйлчилгээг нэг дороос иргэдэд үзүүлэх, “Монгол улсын Засаг захиргаа нутаг дэвсгэрийн нэгж, түүний удирдлагын тухай хууль”-ийн хэрэгжилтийг хангах юм. Төлөөлөгчид сонгогдсон тойргийнхоо  иргэдэд үйл ажиллагаагаа тайлагнах, төрийн үйлчилгээг үзүүлэхэд дэмжлэг үзүүлэх, хурлын бодлого шийдвэрийг сурталчилах, хуульчилсан заалтуудыг хэрэгжүүлэх үүднээс “Иргэдийн оролцоо-Төлөөлөгчийн манлайлал- Төрийн үйлчилгээ” нэгдсэн өдөрлөгийг гурван хэсэгтэй зохион байгуулж байна. Тухайлбал, 11-р сарын 7-ны өдөр Жаргалант суманд зохион байгуулсан бол өнөөдөр Орхон аймгийн Баян-Өндөр сумын спорт зааланд зохион байгуулж байна. Энэхүү өдөрлөгт Говил, Баянцагаан баг, Зэст,Оюут, Уурхайчин, Хүрэнбулаг, Согоот, Уртбулаг, Бүрэнбүст багийн иргэд ирж төлөөлөгчтэйгөө уулзаж санал бодлоо солилцох, төрийн байгууллагуудаар асуудлаа шийдвэрлүүлэх, боломжтой бүтэн өдрийн турш үргэлжлэх юм. Алсын зорилго бол төлөөлөгчдийг иргэдтэй уулзах боломжийг хангаж байна.

-Арваннэгдүгээр сарын 7-нд Жаргалант сумын иргэдтэй уулзахад ямар хүсэлт санал тавьж байна вэ?

-Жаргалант сум агропаркын чиглэлтэй анх байгуулагдаж байсан. Манай хөдөөний ганц сум. Намрын ургац хураалт дуусч байх үед уулзалт зохион байгуулсан. Иргэдээс хурааж авсан хүнсний ногоогоо хадгалах, орчин үеийн зоорь шаардаж байна. Тухайн  хүнсний ногоо хадгалах зоорь болон хүнсний ногоогоо даршилж эцсийн бүтээгдэхүүн үйлдвэрлэх, боломжийг судлах, мөн гурван улирлын хүлэмжийн асуудлыг яах вэ гэх асуудлаар иргэдээс санал хүсэлт тавьсан. Энэ асуудлыг шат дараатай шийднэ. Жаргалант сумын уурын зуух хүчин чадал сайжирч, шинээр бий болсон, жижиг дунд үйлдвэрүүдийг хөгжүүлэхэд ачаалал даах хүчин чадал харьцангуй сайжирсан. Жаргалант сумын иргэдийн хүсэлтийг шийдвэрлэх үүднээс 2023 оны төсөв дээр 3 тэрбум төгрөгийн өртөгтэй нарийн технологи шаардсан ногоог хадгалах зоорийг улсын төсвийн хөрөнгө оруулалтаар оруулах төсөлтэй байна. Аймгийн ИТХ арванхоёрдугаар сарын 1-ны өдрийн хурлаар тухайн асуудал батлагдана. Тухайн ногооны зоорийг барьснаар хэрэглэгчид эрүүл аюулгүй хадгалсан хүнсний ногоо хэрэглэнэ, мөн ногоо тарьж буй тариаланчид ченжүүдийн гар дамжуулахгүйгээр худалдан борлуулах нөхцөл боломж бүрдэх юм. Үүнээс хойш Жаргалант суманд агропаркын чиглэлээр хэрхэн ажиллах,  эрчимжсэн мал аж ахуйн чиглэлээр хэрхэн ажиллах, тэжээлийн үйлдвэр, жижиг хүнсний чиглэлийн үйлдвэрүүд хэрхэн байгуулах тал дээр 2022-2027 онд хэрэгжих хүнсний төлөвлөгөө батлагдсан. Үүний үндсэн дээр тухайн орчинд байгаа бизнес эрхлэгчид рүү чиглэсэн ажлууд хийгдэнэ гэж үзэж байна.