Орхон аймгийн нийтийн тээврийн парк шинэчлэлийг сайжруулах зорилгоор орон нутгийн төсвөөс 12 автобусыг авч, аж ахуйн нэгж байгууллагуудад эзэмшүүлэхээр гардуулан өгч байна. 2020-2024 он хүртэл аймгийг хөгжүүлэх 5 жилийн үндсэн чиглэл, аймгийн Засаг даргын үйл ажиллагааны хөьөлбөрийн дагуу дээрх хөрөнгө оруулалтыг шийдсэн байна. Орон нутгийн төсөвт өнгөрсөн онд 2,2м тэрбум төгрөг тусгаж, нийтийн тээврийн үйлчилгээнд 12 ширхэг дунд оврын автобусыг авч байна.

Хотын дотор нийтийн тээврийн үйлчилгээ “ББ-ОД” компанид 5, “Тод Од транс” компанид 4, “Автомастер” компанид нэг ширхэг автобусыг ашиглуулж, эзэмшүүлэх гэрээгээр хүлээлгэн өглөө. Мөн Жаргалант сумын ахмад настан, сурагчдын автобусыг шинэчилж нэг ширхэг автобус өгсөн байна. Аймгийн сурагчдын автобусны тоог нэмэгдүүлж 1 автобус Хот тохижуулах газарт хүлээлгэн өглөө.

Гэр хорооллын айл өрхийн тоо нэмэгдэж, багууд тэлэхийн хэрээр нийтийн тээврийн хүрэлцээ хангамж асуудал дагуулдаг. Алслагдсан багууд руу автобусны хүртээмж муу байгаа зэрэг асуудалд шинээр авсан 12 автобусны парк шинэчлэлт тус нэмэр болох юм. Цаашид орон нутгийн хөрөнгөөр нийтийн тээврийн хүртээмжийг нэмэгдүүлэхэд анхаарч ажиллах болно гэдгээ аймгийн удирдлагууд ярьж байна.