“Алтан төлийн эзэн” шагнал хүртсэн малчин гэр бүлд Мотоцикл бэлэглэдэг Ц.Анандбазараас өөр УИХ-ын гишүүн одоохондоо байхгүй. Монголын Үндэсний томоохон компанийн үүсгэн байгуулагч, хөдөлмөрч хүний хувьд хоногийн 24 цагийг малын араас явдаг малчин хүнийг үнэлсэн түүний шударга үнэлэмж юм. “Үзэсгэлэн болгогч” хэмээх туулай жилийн босгон дээр Булган аймгаас Засгийн газар, МҮОНРТ-ийн нэрэмжит “Алтан төлийн эзэн” шагналаар 12 малчин гэр бүл шагнуулсан. Эдгээрээс долоон малчны шагналыг УИХ-ын гишүүн, Булган нутгийн зөвлөлийн тэргүүн Ц.Анандбазар малчны хотонд нь очиж гардуулахдаа моторт хүлэг Мотоциклоор мялаажээ. Өнгөрсөн онд 15 малчин өрхийг ийнхүү моторт хүлгээр баярлуулсан байна.

Өнгөрөн одож буй бар жилийн ажил үйлсээрээ Баяннуур сумын малчин Ж.Бадам, Д.Нэргүй, Могод сумын малчин М.Мижиддорж, Л.Мягмарцэцэг, Бүрэгхангай сумын малчин Р.Болд, П.Цэцгээ, Сайхан сумын малчин Н.Лхагвасүрэн, Орхон сумын малчин Ч.Пүрэвсүрэн, Ш.Болормаа нарын гэр бүл “Алтан унаганы эзэн” шагналыг хүртлээ. Мөн Рашаант сумын малчин М.Нямхүү, Д.Цэенхүү нар “Алтан хурганы эзэн”, Хишиг-Өндөр сумын малчин П.Баасантулга, Н.Пүрэвмаа нар “Алтан тугалын эзэн” шагналыг УИХ-ын гишүүн Ц.Анандбазараас гардан авлаа.

“Монголчууд төлөөр баяжиж, шөлөөр цаддаг” гэсэн уламжлалтай малч ард түмэн билээ. Тиймээс төл бүрээ мал болгохын төлөө борви бохисхийлгүй зүтгэдэг малчин хүний ажил хамгийн хүнд хөдөлмөр юм. Цаашдаа малын тооноос илүү чанарт анхаарч, чанарлаг сүргийн бүтэц бий болгохын чухлыг Булган нутгийн зөвлөлийн тэргүүн очсон айл бүртээ ярьж явлаа.

Засгийн газрын нэрэмжит “Алтан төлийн эзэн” шагнал нь малчдын хувьд нэр хүндтэй шагналын нэг төдийгүй цаашид таван хошуу малаа таван төрлөөр нь өсгөж бойжуулах шаардлага тавьж байгаа. Хангайн аймгууд тэмээг нутагшуулан өсгөхөд ихээхэн анхаарах талаар малчидтай хөөрөлдөж явсан юм. Ийнхүү Булган аймгийн “Алтан төлийн эзэд” шагналаа Мотоциклоор мялаалгав.