Тус замын ажлын гүйцэтгэгч “Хурдны зам” ХХК-ийн Ерөнхий инженер Д.Эрдэнэбаатартай Хангал-Хялганат-Эрдэнэт чиглэлийн замын ажлын явцаас тодрууллаа.

-Эрдэнэт-Хангал-Хялганат чиглэлийн 53,6 км автозамын ажил хоёр хэсэг багцтай. Эхний хэсэг нь гурван замын уулзвараас 30 км хүртэл нэгдүгээр багц, хоёрдугаар багц нь Хангалаас Хялганатын гүүр хүртэл 23,6 км замын ажил юм. “Замын битум” компани өнгөрсөн намар хуучин бетон хучилт дээр тэгшилгээний үе бетон, далангийн ажлуудаа хийгээд буусан. “Хурдны зам” компанийн хувьд газар шороо, гүүрийн засвар зэрэг бэлтгэл ажлуудаа гүйцэтгээд байна.

-Замын гэрээт хугацаа 2023 оны арваннэгдүгээр сард дуусгаж хүлээлгэн өгнө. Одоогийн байдлаар төлөвлөгөөний дагуу ажлууд хийгдээд явж байна. Гуравдугаар сарын сүүлээс гүүрийн ажлууд, дөрөвдүгээр сарын 10-даас газар шорооны ажил, асфальт хучилт тавдугаар сарын 10-д гаргаад эхлүүлнэ. Одоогоор бэлтгэл ажил чулуу бутлах, битум, цемент татах зэрэг ажлыг хийж байна.

-Туслах замын хувьд зарим хэсгүүдэд гаргах боломжгүй. Тэр газрууд дээрээ хөдөлгөөн зохион байгуулалт хийнэ. Үндсэн далангаа ашиглаж нэг талын урсгалаар явуулна. Зарим нэг хэсэг газруудад түр зам хийнэ. Гэхдээ түр зам дээр тусад нь өндөр далан барихгүй. Шаардлагатай хонхойх хэсгүүдэд шороо дүүргэх зэргээр түр замыг шийдээд явна.