Эрх баригчид маань өнгөрсөн 7 хоногт биднээр нэг сайн гэгч нь тоглочихлоо, янз нь. Бүр тоо таалгаж, бодуулж тэгснээ тоог үзэж ядуулж, хараалгаж байх ч шиг. УИХ-ын даргын захирамжаар гишүүд орон нутагтаа ажиллаж Үндсэн хуулдийн нэмэлт өөрчлөлтийн хүрээнд гишүүдийн тоог 152 болгох тал дээр ухуулга сурталчилгаа хий, бүр болохгүй бол саналыг нь танд гээд явуулсан.

Иргэд УИХ-ын гишүүдийг юу яасан 152 болгох. Өнөө маргаашийн талх гурил, махаа яая гэж байхад  гишүүдийн тоог нэмэх нь иргэдийн хувьд бараг 100 дахь асуудал нь байсан. Зарим газар 152 гэсэн тоог санал болгосон гишүүнээ “Чамайг дахиж сонгож харагдаач. Чи дахиж битгий ирээрэй” хэмээн хөөсөн дуулддаг. Өндөг шидүүлээгүй өнөөх нийслэл рүүгээ буцсан гишүүд УИХ-ын даргадаа “152 болгоно гэж саналтгүй юм байна. Алуулах шахлаа” хэмээн тайлагнасан байна.

Гэтэл өчигдрөөс гэнэтхэн УИХ-ын гишүүдийн тоог 126 болгох тухай шуугиж эхэллээ. 76 нь тойргоос үлдсэн 50 нь жагсаалтаар гарах энэ хувилбар иргэдэд ч намуудад ч ашигтай, хамгийн шилдэг гарц нь ч байж болно хэмээн тайлбарлах юм. Эндээс харвал Парламентын гишүүд шууд л иргэдээсээ гишүүдийн тоог 126 болгоно, дэмжих дэмжихгүй чинь хамаагүй. Сонголт бидний гарт гээд шулуухан хэлчихвэл дээр байлаа. Иргэдэд саналын нэг ч гэсэн квот байхгүй юм чинь гишүүдийн тоог нэмж 152 болгохгүй гэж хашхираад даралтаа ихэсгээд, эмчид хандах шаардлагагүй  байсан даа. Эндээс харвал эрх баригчид иргэд, сонгогчдоо 152 гэсэн тоогоор зүгээр л нэг тохуурхаж, тоглосон байх нь. Нэг үгээр бол 152-оос  хэдийг хасвал 126 гарах вэ гэж асуусан юм уу даа, янз нь.  

Одоо 126 гэдэг тоог янз бүрээр тайлбарлана даа. Тийм бурханы мутар нь 126 байдаг гээд л авах болов уу. Аль эсвэл 126 гэдэг чинь Азын тоо шүү гэж ч мэдэх байх.