Засаг даргын шуурхайд өнгөрсөн 7 хоногийн үйл явцын талаар мэдээлэл хийдэг. Мөн иргэдээс ирүүлсэн санал, хүсэлттэй ч танилцдаг. Өнгөрсөн 7 хоногт нэгэн иргэнээс “Хүүхдийн тоглоомын талбайн орчимд байсан арматурын төмрөөс болж хүүхэд нь гэмтсэн. Үүнийг засч өгнө үү” хэмээн хүсэлт гаргажээ.

Энэ асуудалд аймгийн Засаг дарга С.Батжаргал “Аюулыг мэдэрдэг апплекэйш хийнэ гэж Хотын захирагчийн алба мөнгө гаргуулж авсан. Тэр ажил юу болов. Ийм апп хийчихвэл иргэд мэдээлэл өгөөд бид дор нь засч янзлаад байх боломжтой гээд хөрөнгө мөнгийг нь гаргуулж авсан. Тэрхүү аюул мэдээлдэг апп-ийг амь оруулъя Одгэрэл дарга аа. Яагаад удаад байгаа юм бэ” хэмээн бухимдав.

Ер нь Хотын захирагчийн алба гэж татвар төлөгчдийн мөнгийг хайр гамгүй байдлаар хэрэгтэй хэрэггүй вэб сайт хийх, апп бий болгох нэрийдлээр үргүй зардаг газар байна. Хоёр жилийн өмнө Хотын захирагчийн алба 9.9 сая төгрөгөөр дэргэдээ вэб  сайт хийлгэсэн. Одоо түүнийг нь мэддэг жирийн иргэн байтугай дарга нар ч байхгүй. Гэтэл Одгэрэл даргын үед дахиад л иргэдэд зориулсан апп хийнэ гээд мөнгө гаргуулчихаад хийхгүй байгааг  шуурхайд оролцогсод үнэндээ ойлгоогүй. Хий дэмий нэр томъёо гаргаж ирж мөнгө зарах гэж байхаар иргэд Онцгой байдлын 7035101 тоот утсанд хандвал арай амархан байж ч мэдэх юм.