“Шинжлэх ухаан технологийн паркийн дарга Энхбаярын цагийн бүртгэдэг албан тушаалтан байна уу. Энэ хүний барааг харалгүй их удлаа. Өнөөдөр л  барааг нь харж байна. Уг нь ШУТП гэдэг байгууллага бол аймгийн Засаг даргын дэргэдэх хэрэгжүүлэгч агентлаг. Гэтэл энэ байгууллагын ажилтнуудтай уулзаж ажил ярихлаар “танай аймаг, танай талын ажил” гээд хачин юм яриад байх юм. Орхон аймгийн татвар төлөгчдийн мөнгөөр санхүүжиж байгаа гэдгээ ойлгодоггүй юм уу. Тэгээд даргынх нь бараа нь харагддаггүй, ажил явдаггүй байж болох уу” хэмээн аймгийн Засаг даргын шуурхай дээр орлогч дарга А.Түвшинжаргал бухимдлаа илэрхийллээ.

Үнэхээр манай аймагт ШУТП гэдэг мундаг нэртэй даржин байгууллага бий. Хотын төвөөс нэлээн зайдуу тэр бүр хүн очоод байдаггүй. Зорьж л очихгүй бол. Нэг хэсэг гагнуурын электрод үйлдвэрлэж байна, Эрдэнэтэд эко будаг хийж эхэллээ гээд сэтгүүлчдийг аваачиж үзүүлээд л. Хүний хордлогын түвшинг тогтоох лаборатори байгууллаа гээд л сүржигнэсэн. Өнөөдөр дээрх гурван үйлдвэр ажиллаж байгаа юм уу. Энхбаяр дарга нэг дуулахад гадаадад томилолттой яваа, эргээд нэг харахад Баянхонгорт сургалтад, бас дахин асуухад Улаанбаатарт томилолттой гээд сураг нь л сонсогддог хүн байдаг. Үнэндээ 2017 онд Энхбаяр энэ байгууллагын дарга болсноосоо хойш эрдэнэтчүүд дундаа л хамгийн олон удаа гадаад явсан, туршлага судалсан хүнээр тодорно. Гагцхүү үр дүн нь эрдэнэтчүүдийн нүдэнд харагдаж, гарт баригдахгүй юм. А.Түвшинжаргал даргын бухимдлыг мэдэрсэн аймгийн Засаг дарга С.Батжаргалын зүгээс “Ирэх 7 хоногийн шуурхайд Энхбаяр дарга тайлангаа тавь” гэж үүрэг өглөө.