Аймгийн Засаг даргын шуурхайн төгсгөлд байгууллагын дарга нарт үүрэг даалгавар өглөө. Энэ үеэр аймгийн Засаг даргын орлогч А.Түвшинжаргал аймгийн Онцгой комиссын гишүүдэд албажуулах чиглэлээр үүрэг даалгавар өгөв. Тэрбээр, “Сая зургаадугаар сарын 4-ний өдөр 17:00 цагт Үндэсний аюулгүй байдлын зөвлөмжийн дагуу яаралтай цугларах арга хэмжээг Онцгой байдлын газраас зохион байгуулсан. Орхон аймгийн Онцгой комиссын гишүүн 34 хүн байдаг. Тэд бэлэн цугларах ёстой. Яг цагтаа, өөрийн биеэр цугласан 12, орны хүнээ явуулсан 11, ирээгүй 11 албан тушаалтан байна. Ирц хангалтгүй байсан. Энэ цугларалтаар юу үзсэн бэ гэхлээр хувцасны жигдэрэлт, аранзны үзлэг хийсэн. Мөн штабын дадлага, сургалт зохион байгуулах бүтэц дараалал танилцуулах гэдэг зүйлийг ярьсан. Ирээгүй дарга нар өөрсдийгөө мэдэж байгаа байх. Би нэгбүрчлэн уншаад яахав. Бас хэвлэлээр та нарыг ингэлээ, тэглээ гээд бичих л байх. Дараагийн удаа ийм байдал гаргамааргүй байна аа. Орныхоо хүнийг явуулдаг асуудлаа болимоор байна. Танихгүй дугаар авдаггүй, ажлын бус цагаар утсаа салгадаг ийм асуудлаа Онцгой комиссын гишүүд болих хэрэгтэй. Аймгийн Онцгой комиссын гишүүд утсаа салгахгүй байх ёстой. Гишүүд дуудлага хүлээн авсан даруйдаа зуны цагт 40 минутийн дотор, өвөл бол 60 минутийн дотор бэлэн байх ёстой. Онцгой комиссын журамаа уншмаар байна. Орны хүнээ явуулсан, ирээгүй хүмүүсийн тайлбарыг харахлаар утас нь холбогдоогүй, мессэж үлдээсэн, хөдөө яваа, Хөвсгөлд байна, амралтанд амарч байна гэх зэрэг тайлбар ирүүлжээ. Цаашид ийм байдалтай байвал аймгийн Онцгой комиссын ажил сайн явахгүй ээ. Магадгүй команд штабын сургалт хангалтгүй болох нөхцөл байдал үүснэ. Өнөөдөр 18:00 цагт энд 61 хүн цуглах ёстой шүү. Цуглах хүмүүс өөрсдийгөө мэдэж байгаа байх гэж ойлгож байна” гэлээ.

Аймгийн Онцгой комиссын гишүүд том эрх мэдэлтэй байдаг. Онцгой нөхцөл үүсэн тохиолдолд шийдвэр гаргадаг. Гэтэл энэ байгууллагын гишүүд гэж яачихсан олхиогүй, онцгүй нөхдүүд байна вэ. Эрдэнэтчүүд онцгой цаг үед, гамшгийн байдад шилжсэн тохиолдолд хамаг бүхнээ та нарт даатгадаг. Нэг үгээр бол та бүхэн бидний амь нас, эрүүл мэндийг хариуцах ёстой эрхмүүд. Гэтэл нэг удаагийн цугларалтад ирэх ёстой 34-өөс ирээгүй 11, орны хүнээ явуулсан 11 гэнэ үү. Арай л доромжилж байгаа юм биш үү. А.Түвшинжаргал дарга ч гэсэн нэр усыг нь ил гаргаж зарла л даа. Юуг нь нууж, хаагаад байгаа юм бэ. Нуух тусам л нөгөөдүүл чинь улам даварна. Онцгой комиссын тусгай хувцас өмссөн, ногоон аранз үүрсэн, томилолтын мөнгө өвөртөлсөн хэдэн хүн л “намайг хэн хэлэх вэ нохойг хэн саах вэ” гэдэг шиг л таахалздаг. Тийм хариуцлагагүй этгээдүүдэд арга хэмжээ авахгүй бол аймгаараа хохирч мэдэх нөхцөл байдалд ч хүрч мэдэх нь.