Сүүлийн үед хотын гудамжаар нохой хөтөлсөн залуус олширсон. Амьтанд хайртай, нохой тэжээдэг тэдний асуудал манай хотын хувьд бас л тулгамдсан бэрхшээлийн нэг болжээ.

Нохой тэжээдэг залуусын хувьд аймгийн Засаг даргад хандан “Нохой салхилуулдаг газар, цэцэрлэгт хүрээлэнтэй болох” тухай саналаа гаргасан байна. Энэ талаар аймгийн Засаг дарга даваа гарагийн шуурхайд танилцуулсан юм. Тэдний асуудлыг шийдэхийн тулд Газрын харилцаа, барилга хот байгуулалтын газрынханд газрын асуудлыг шийдэх санал оруулж ирэхийн үүрэг болголоо.

Дээр нь “Эрдэнэтэд үйлдвэрлэв” нэртэй ЖДҮ болон бичил бизнес эрхлэгчдийн бараа бүтээгдэхүүнийг борлуулах нэгдсэн газрын асуудлыг ч хамтад нь шийдвэрлэхийг мэргэжлийн байгууллагынханд даалгасан юм. Өнөөдрийн байдлаар хотын төв дэх томоохон худалдааны төвийн зарим газарт Эрдэнэтэд үйлдвэрлэсэн бараа бүтээгдэхүүнийг борлуулах лангууны асуудлыг шийдсэн ч эрдэнэтчүүд түүнийг нь төдийлөн сайн мэддэггүй байна.

Аялал жуулчлал хөгжиж байгаа учраас төв зам дагуу “Эрдэнэтэд үйлдвэрлэв” нэртэй барааны худалдааны цэг байсан ч буруудахгүй. Эдгээр асуудлыг шийдэх үүрэг даалгаврыг аймгийн удирдлагаас өгөөд байна.