Уртын голд баригдаж эхний ээлжинд ашиглалтад орсон 104 байрыг хүсэн хүлээсэн гэр хорооллын, орлогод нийцсэн орон сууцанд хамрагдахыг хүссэн иргэдийн өөдөөс дээрх үгийг М.Мөнхбаяр даргатай Ажлын хэсгийнхэн хэлж байна. Тэр бүү хэл ипотекийн зээл авах гэж их удна. Олдоц муутай байдаг гэж дуулгалаа. Тиймээс 30 хувь, 40 хувиа бүрдүүлсэн тэр бүү хэл 90 хувиа бүрдүүлээд үлдсэн 10 хувиа зээлээр авах гэсэн иргэнд ч эхний ээлжийн 77 байранд хамрагдах нь гонжийн жоо болж байх шиг. Ажлын хэсгийн ахлагчийн тайлбарлаж буйгаар бол барилга барьж байгаа компанийг мөнгөжүүлэхийн тулд ипотекийн зээлд хамрагдахыг хүссэн, тэр бүү хэл Зээлийн батлан даалтын санд хамрагдан зээл авахаар бэлтгэлээ базааж буй иргэн ч байртай болох мөрөөдөл нь “улны айл”-тай нийлээд бүтэхгүй мөрөөдөл болох тийшээ хандлаа. Үлдсэн 3 блокын ажлыг эхлүүлэхийн тулд ингэхээс өөр арга байхгүй гэсэн өөрсдийн шийдвэрээ иргэдэд хүчээр тулгаж байгаа Ажлын хэсгийнхэн өнөөдөр амьдралаас арай л тасарчихжээ. Энэ 77 айлын хамгийн бага өрөө нь 33 метр кв. Үүнд орохын тулд 66 сая төгрөг шаардана. Гэртээ 66 сая төгрөгийг авдрандаа хийчихээд “Эрдэнэтэд метр кв нь 1.9 сая төгрөгийн өртөгтэй байр баригдана гээд 5 жил нүүрс түлээд амьдарч байгаа иргэн олон бий” гэж тайлбарлаж байх шиг. Бүр сүүлдээ ипотекийн зээлээ бүү хэл хэдэн банкаа үгүйсгээд зогсож байх юм. Уг нь С.Даваадорж даргатай бас нэг Ажлын хэсгийнхэн Эрдэнэтийн банкны удирдлагатай хамтраад хэвлэлийн хурал хийсэн. Тэр үеэр банкныхан асуудлыг тийм удаан хугацаагаар хүлээлгэхгүй, шийдэх боломжтой. Иргэд гагцхүү бүрдүүлэх материалаа сайн хангах хэрэгтэй гэж байсан нь санаанд орж байна.