Авто замын нөхөлт, засвар үйлчилгээний талаар Хотын захирагчийн албаны дарга Б.Одгэрэлтэй ярилцлаа. 

-Авто замын нөхөлт, засвар үйлчилгээ, замын тэмдэг тэмдэглэгээний ажил хэдэн хувьтай үргэлжилж байна вэ? 
-2023 онд авто замын арчлалт засварт орон нутгийн төсвөөс 500 сая төгрөгийг баталсан. “Орхон АЗЗА” ТӨХК-тай гэрээ байгуулан авто замын нөхөөсийн ажлыг гүйцэтгэж байна. Өнөөдрийн байдлаар  орон сууцны хороолол дундах авто зам, Дэнж, Эрдэнэ, Их залуу багийн чиглэлийн нийт 1950 метр квадрат талбайд авто замын нөхөлт хийсэн. 
Явган хүний гарцын тэмдэглэгээг хийх ажил 30 хувьтай байна. Нийт явган хүний  65 гарцын  тэмдэглэгээг хийх ёстой.  Барилгачдын талбайгаас Сүмийн уулзвар хүртэлх 22.7 км хэвтээ тэмдэглэгээг шинээр хийсэн. 
Босоо тэмдэг дээр 125 тэмдэг угсрахаас  одоогийн байдлаар Эрдэнэ,Говил  багт хийсэн нийт гүйцэтгэлээрээ 40 хувьтай үргэлжилж  байна.

-Бороо хур ихтэй байгаа нь авто зам засварын ажилд нөлөөлж байна. Хэзээ дуусах вэ? 
- Хуурай суурь бэлтгэн   асфальтан хучилт, нөхөөс хийх  авто замын ажлын технологи байдаг. Энэ жил өмнөх жилүүдээс хур бороо элбэгтэй байна. Цаг агаарын төлөв байдлыг ажиглаж байгаад аль болох бороо хургүй өдөр ажлаа гүйцэтгэж байгаа  нь хугацаа хойшлох, сунжирхад нөлөөлж  байна. Наймдугаар сард багтаан авто замын засвар үйлчилгээтэй холбоотой ажлыг дуусгах төлөвлөгөөтэй ажиллаж байна.

-“Жил бүр авто зам нөхөх юм” гэсэн санал, шүүмжийг иргэдээс гаргаж байна. Үүнд тайлбар өгнө үү?
-Манай аймагт хатуу хучилттай 100 гаруй км  орон нутгийн чанартай авто зам бий. Үүний 40 гаруй хувь нь нэлээн хуучны авто зам. Ус их тогтдог, хагарал, суулт ихтэй. Нэг хэсгийг нь нөхөөд засдаг ч нөгөө хэсэгт нь борооноос үүдэлтэй суулт өгч, хагарч бутарсан хэсгүүд шинээр нэмэгдэж байна. Түүнээс биш нөхсөн хэсгүүд нь дахиад эвдрээгүй, эргэн тойрны торон хагаралтай хэсэгт нэмж эвдрээд байгаа юм. 

Ер нь бол суулт, хагарал, ихтэй авто замуудыг суурийн хамт шинэчлэн шинээр асфальтан хучилт хийж байж үр дүн гарна.  Гэхдээ  байгаа нөөц боломж нь энэ юм. Төсөв, санхүүгийн нөөц боломждоо тулгуурлан үүссэн онгорхой нүхээ бөглөж байна. Шинээр үүссэн эвдрэлүүдийг засварлах хөрөнгийн эх үүсвэрийг баяр наадмын өмнө шийдвэрлэсэн. Тодруулбал,  аймгийн ИТХ-ын хуралдаанаар Төсвийн тодотгол хэлэлцэх үед Аваарын зардал дээр тодотголоор  авто замд нөхөөс хийх зардлыг баталсан. 

Энэ хүрээнд гэр хороолол болон орон сууцны хороолол доторх 3500 метр квадрат талбайн авто замын нөхөөсний ажил эхэлсэн байна.БОЭТ орчимд 2000 гаруй метр квадрат талбай, Барилгачдын талбай орчимд 3500 метр квадрат талбай, Үйлчилгээний төв орчимд 1100 метр квадрат талбайд нөхөөс хийнэ. Жаргалант сумын  орон сууцны хороолол дотор гарсан 259 метр квадрат талбайн эвдрэлийг  нөхөхөөр зураг төсөв тооцоог гаргаад байна. 

-Ялангуяа Дэнжийн зам жил  бүр иргэдийн бухимдлыг төрүүлдэг шүү дээ. 
-Тийм.  Дэнжийн зам 2013 онд ашиглалтад орсон. Нэг жилийн дараа  суулт өгөөд цөмөрч  эхэлсэн. Өнгөрсөн хугацаанд тодорхой хэмжээнд жилд 50-60 метр замыг суурь хөрстэй нь солих ажлыг хийж байна. Үлдсэн хэсгүүдэд шинээр эвдрэл суулт, цөмрөлт  үүсээд байгаа юм.  Дэнжийн замыг нийтэд нь сууринаас шинэчилж  хучих шаардлагатай. Гэхдээ төсөв өндөртэй. Нэг километр авто замын өртөг нэг тэрбум гаруй төгрөг болдог. Гурван километр гаруй урттай Дэнжийн замыг шууд нэг дор бүтнээр нь засварлах  хөрөнгийн эх үүсвэр байхгүй байна. Баяр наадмын өмнө Дэнж, Эрдэнэ багийн авто замд 1004м2 талбайд эвдрэл үүссэнийг асфальтбетоноор нөхөх ажлыг  "Орхон АЗЗА" ТӨХК гүйцэтгэсэн боловч бороо ихтэй байгаагаас шалтгаалан торон хагаралууд бутарч замд эвдрэл гарсан. Үүнийг дахин нэмж нөхөн засварлана. 

Мэдээллийн төв