Орхон аймгийн ИТХ-ын есдүгээр сарын 14-ний өдрийн 16-р хуралдаанаар аймгийн ИТХ-ын төлөөлөгч Б.Оюунбаярын бүрэн эрхийг дуусгавар болгох тухай хэлэлцэж шийдвэрлэсэн байна. Хот тохижуулах газрын даргаар ажиллаж байсан Б.Оюунбаяртай холбоотой Орхон аймгийн Баян-Өндөр сумын Сум дундын эрүүгийн хэргийн анхан шатны шүүхийн 2023 оны 06-р сарын 13-ны өдрийн шүүгч Ц.Алтангадас, улсын яллагч Ж.Батбаатар нарын даргалж хуралдсан хуралдааны шүүхийн шийтгэх тогтоол гарсан байна.

Уг тогтоолд: “Эрүүгийн хуулийн ерөнхий ангийн 1.8 дугаар зүйлийн 1 дэх хэсэгт заасныг журамлан тусгай ангийн 22.1 дүгээр зүйлийн 2 дахь хэсэгт заасан нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж их хэмжээний хохирол учруулсан гэмт хэрэг үйлдсэн гэм буруутайд тооцсугай.

Эрүүгийн хуулийн ерөнхий ангийн 1.8 дугаар зүйлийн 1 дэх хэсэгт заасныг журамлан Эрүүгийн хуулийн тусгай ангийн 22.1 дүгээр зүйлийн 2 дахь хэсэгт зааснаар шүүгдэгч Б.О-г нийтийн албанд томилогдох эрхийг 2 жилийн хугацаагаар хасч, 25000 нэгжтэй тэнцэх хэмжээний төгрөгөөр буюу 25 000 000 /хорин таван сая/ төгрөгөөр торгох ялаар шийтгэсүгэй” гэж дурьдсан байна.

Дээрх тогтоолын дагуу аймгийн ИТХ-ын төлөөлөгчөөр сонгогдсон Б.Оюунбаярыг төлөөлөгчийн бүрэн эрхийг нь дуусгавар болгосон байна. Орхон аймгийн ИТХ-ын хуралдаанаар уг асуудлыг хаалттай хэлэлцлээ.