“Хот тохижуулах газар, Цэцэрлэгжүүлэлт ногоон байгууламжийн газрын бүтэц, орон тоо, цалингийн зэрэглэлийг шинэчлэн батлах тухай” гэсэн асуудлыг пүрэв гарагт болсон аймгийн ИТХ-ын ээлжит XVI хуралдаанаар хэлэлцсэн. Энэ үеэр аймгийн ИТХ-ын төлөөлөгчид “Хот тохижуулах газрын орон тоо нэмэгдэж байгаа бол ажилчдын ачаалал буурч байгаа юу. Одоо өвөл боллоо, цас мөсөө нүддэг хэвээрээ байх уу. Ажилчид чинь суганыхаа булчихайг цочтол цас нүддэг. Гар ажиллагаанаас техникжих тал руу шилжих боломж бий юү. Шинээр баригдаж байгаа 2А зэрэг байшин хороололд зам талбайн цэвэрлэгч ажиллах уу” гэх зэрэг олон асуултад Хот тохижуулах газрын дарга Б.Мөнхдалайгаас асуулт асууж, саналаа хэлсэн юм. Тухайлбал, аймгийн ИТХ-ын төлөөлөгч П.Пүрэвлхагва “Асуудал оруулж ирж буй процесс дээрээ цаашид анхаармаар байна. Тухайн байгууллагын төсвийг нь баталж байхад орон тоог нь ярих ёстой шүү. Үүнийг сайн анхаарах хэрэгтэй байна. Өмнөх хүн чинь хурдан ч ярьдаг, хурдтай ч ажилладаг байсан. Та ажлаа аваад багагүй хугацаа өнгөрлөө. Одоо ажлаа л хиймээр байна” гэсэн юм.