Аймгийн Авто тээврийн төвийн даргын албан үүргийг түр орлон гүйцэтгэгч Т.Бадамсэрээжид аймгийн Засаг даргын шуурхайд мэдээлэл хийлээ. Тэрбээр “Засгийн газрын тогтоол, яамны сайдын удирдамж, тушаал шийдвэрийн дагуу төрийн албан хэрэгцээнд ашиглаж байгаа бүх машины улсын дугаарын өнгийг өөрчлөхөөр болсон. Ажлын явц аймаг орон нутагт ямар байгаа талаар 10 дугаар сарын 1-н гэхэд Засгийн газарт танилцуулагдана. Иймээс манай аймгийн хувьд төрийн албан хэрэгцээнд ашиглаж байгаа, төрийн байгууллагын бүх автомашины дугаарын өнгийг өөрчлөх ажил хийж байгаа. Төлбөр, үнэ өртөгийн хувьд 40 мянган төгрөгийн үнэтэй байна. Тээврийн хэрэгслийн гэрчилгээ солихгүй, гэрчилгээн дээр улсын дугаарын дэвсгэрийн өнгө өөрчлөгдсөн тухай тэмдэглэнэ. Энэ ажилд байгууллагын дарга нар идэвхтэй оролцох шаардлагатай байна” гэв.

Засгийн газраас албан хэрэгцээнд ашиглаж байгаа, төрийн гэх тодотголтой бүх машины улсын дугаарын дэвсгэрийн өнгийг цэнхэр байхаар тогтосон билээ. Манай аймгийн хувьд төрд бүртгэлтэй, төрийн албан хэрэгцээнд ашиглагдаж байгаа 304 тээврийн хэрэгсэл байдаг. Нийтдээ 39 төрийн байгууллагад том оврын жийп автомашин 25, дунд гарын жийп 18, суудлын автомашин 67, автобус 4, микроавтобус 32, УАЗ төрлийн автомашин 11 байдаг гэнэ. Мөн трактор, автоачигч, автовишк 14, дунд оврын ачааны автомашин 10, портер, бонго, пронтер 22, Хово 37, мотоцикль 23, тоноглогдсон тусгай зориулалтын автомашин 13, хөдөө аж ахуйн зориулалттай 28 техник, тоног төхөөрмж байдаг ажээ. Засгийн газрын тогтоол, сайдын тушаал шийдвэрийн хүрээнд Ахмадын автобусны улсын дугаарын дэвсгэр өнгө ч цэнхэр болох юм.