Эрдэнэ баг дахь 20 дугаар сургуулийн ард 3,4 га талбайд эрчим хүчний хэмнэлттэй орон сууц барих төсөл зарлагдсан. Хэд хэдэн компани хүсэлт танилцуулгаа өгсөн ч аймгийн Засаг даргын орлогчийн санаанд огтхон ч нийцсэнгүй. Харин ч Дархан хотод ажиллахдаа танилцаж судалсан барилгын загварыг таашаан магтаад сүйд.

Монгол ноосон дулаалгатай 82 метр квадрат, хоёр унтлагын өрөөтэй орон сууц нь бүрэн тавилга, цахилгаан хэрэгсэлтэйгээ 3.2 сая төгрөгөөр худалдаалж байгаа гэнэ. Бүр "дивантай" гээд онцолсон загвар руу Хот байгуулалт, барилга Захиалагчийн албаны П.Баясгалан даргын нэрийг дурьдсан тул бусдыгаа аваад явна уу, та. Аймгаас зарласан төсөлд ирүүлсэн материалууд нь хөндий хоосон байшинг метр квадратыг нь 3.4 сая төгрөгөөр үнэлж байгаа нь зүйд нийцэхгүй гэж үзээд ийм санал гаргаж байгаа бололтой, аймгийн орлогч дарга маань.

Мэдээж дулааны шугам сүлжээнд холбогдох шаардлагагүй тийм сайхан хувийн орон сууцнуудыг Эрдэнэт хотдоо барьж байгуулчихвал хичнээн хэрэгтэй билээ дээ. Хурдан явж үзэцгээнэ биз. Харин үлдсэн хэсэг нь нийтийн тээврийг сайжруулах зорилгоор нийслэл хотыг зорих даалгавар авсан. Дуулиан шуугиан, шүүх цагдаа болж 600 автобусаар парк шинэчлэл хийсэн Улаанбаатарын удирдлагуудаас туршлага судлаад ирэх юм гэнэ. Алдааг нь давтчихгүй хэмнэлтийг нь сураад Эрдэнэт хотдоо суурьшуулчихвал ээ дээ, их хэрэгтэй л байна. "Цавчаа ногоон"-ы хэргийг аймагтаа тарьчихгүй, төрийн хэмнэлт бус данхар бүтэц байгуулчихгүй бол авчирсан автобуснуудыг нь хазаж, чимхэж, маажиж, малтаж шалгахаар иргэд, зорчигчид бид чинь хүлээж, харж сууя даа.