“Эрдэнэт” үйлдвэрийн баялаг бүтээгч хамт олон Та бүхэндээ сайн сайхны ерөөл өргөж, 17-р жарны хөхөгчин хонин жилийн Сар шинийн мэндчилгээг дэвшүүлье. Манай үйлдвэр  2014 онд хүдэр олборлолтын төлөвлөгөөг 101.8 хувь, хүдэр боловсруулалтын төлөвлөгөөг 100.5 хувиар биелүүлж, төлөвлөгөөнөөс 4526 тонн баяжмал дахь зэс, 634.6 тонн баяжмал дахь молибденийг илүү үйлдвэрлэлээ. Үүний үр дүнд 199.7 тэрбум төгрөгийн таваарын бүтээгдэхүүн нэмж борлуулан, таваарын бүтээгдэхүүн үйлдвэрлэлийн зардлыг 97.9 сая төгрөгөөр бууруулан нийт 167.5 тэрбум төгрөгийн цэвэр ашигтай ажилласан байна. “Эрдэнэт” үйлдвэр өнгөрсөн онд нийт 1,3 их наяд төгрөгийн таваарын бүтээгдэхүүн үйлдвэрлэн борлуулсан нь компанийн түүхэн хугацаан дахь хамгийн дээд үзүүлэлт байлаа. Мөн түүнчлэн2014 онд улсын болон орон нутгийн төсөвт 430,7 тэрбум төгрөг төвлөрүүллээ. Бид сүүлийн хоёр жилд компанийн эдийн засгийн үр ашгийг дээшлүүлэх, өртөг зардлыг бууруулах, санхүүгийн байдлыг тогтворжуулах цогц арга хэмжээг үе шаттай авч хэрэгжүүлсэн нь үр дүнгээ өгч байна. Тухайлбал, 2014 онд Компанийн орлогын төлөвлөгөөг 200.6 тэрбум төгрөгөөр буюу 18 хувиар давуулан биелүүлж, 1 тн цэвэр зэсийн тооцоот өртөг 5364.42 ам.долларт хүрч төлөвлөснөөс 733.7 ам.доллараар буурууллаа. Мөн технологийн бараа, материалын худалдан авалтын үнийг бууруулснаар 45.3 тэрбум төгрөгийн хэмнэлт гаргасан зэрэг олон амжилтаар Сар шинийн баяраа угтаж байна. Манай хамт олон ийнхүү амжилттай ажиллахын зэрэгцээ өнгөрсөн онд Баяжуулах фабрикийн Өөрөө нунтаглах хэсгийн өргөтгөлийг барьж байгуулах, “Эрдэнэт медикал” оношилгоо, эмчилгээний төвийг ашиглалтанд оруулах гэсэн хоёр том төслийг бүрэн дүүрэн хэрэгжүүлэхэд ихээхэн анхаарал хандууллаа. Өөрөө нунтаглах хэсгийн өргөтгөлийг 2015 оны 4-р сард ашиглалтанд хүлээн авах зорилго тавин ажиллаж байна. Энэ өргөтгөл ашиглалтанд орсноор манай үйлдвэрийн хүдэр боловсруулалт 6 сая тонноор нэмэгдэх юм. Мөн дэлхийн стандартад нийцсэн эрүүл мэндийн үйлчилгээг Монголын ард иргэдэд үзүүлэх “Эрдэнэт медикал” оношилгоо, эмчилгээний төвийг “Эрдэнэт” үйлдвэрийн хөрөнгө оруулалтаар Орхон аймагт барьж байгуулан өнгөрсөн оны 12-р сард тус төвийн барилга, дэд бүтэц, тоног төхөөрөмжийг ашиглалтанд хүлээн авлаа. Энэ төвийн үйл ажиллагааг 2015 оны 5-р сард эхлүүлэхээр шамдан ажиллаж байна. Орхон аймагт өнгөрсөн онд шинээр байгуулагдсан болон өөрчлөлт шинэчлэл хийж үйл ажиллагаагаа өргөтгөсөн олон үйлдвэрийг “Эрдэнэт” үйлдвэр дэмжиж бүтээгдэхүүнийг нь худалдан авах замаар орон нутгийнхаа хөгжилд тодорхой хувь нэмэр оруулсаар байна. Үйлдвэрийн нийт ажиллагсад, ахмадууд, тэдний гэр бүл, гадаадын мэргэжилтнүүд, түншлэгч байгууллагууд, Орхон аймгийн нийт иргэд Та бүхэндээ ажлын өндөр амжилт, эрүүл энх, сайн сайхан бүхнийг хүсэн ерөөе. Сар шинэдээ сайхан шинэлээрэй. Эрдэнэт үйлдвэр ХХК-ийн Ерөнхий захирал, Монгол улсын Аж үйлдвэрийн гавьяат ажилтан Ц.ДАВААЦЭРЭН