Монгол улсын Ерөнхийлөгч Ц.Элбэгдоржийн санаачлагаар тавдугаар сарын 26-ны өдрийг жил бүр “Үндэсний бичиг соёлоо дээдлэх өдөр” болгон тэмдэглэж ирсэн. Энэ өдрийг угтан аймгийн Боловсрол соёлын газар, Номын төв хамтран сарын аян зарлаж, олон төрлийн ажил зохион байгуулжээ. Мөн энэ хичээлийн жилд үндэсний бичиг соёлыг түгээн дэлгэрүүлэх үйлсэд хувь нэмрээ оруулсан байгууллага, хувь хүнийг шагнаж урамшууллаа. Төгсөх ангийн сурагчдын ЭЕШ-ын Монгол хэл, бичгийн шалгалтанд зориулж, телевизийн цуврал теле хичээлийн 40 гаруй дугаар бэлтгэсэн “Оюуны боловсролыг дээдлэгч” “Тусгал-1” телевиз, “Үгийн увидас” нэвтрүүлэг бэлтгэн цацсан “Эрдэнэт” телевизийн хамт олныг “Үндэсний бичиг соёлыг түгээн дэлгэрүүлэгч”-ээр өргөмжлөж, шагналыг нь гардууллаа. Мөн ЕБС-ийн 9-12 дугаар ангийн сурагчдын дунд “Сайхан бичигтэн”-ий уралдаан, түргэн хэллэг, уран уншлагын уралдаан зарлан дүгнэж, түрүүлсэн сурагч, анги хамт олныг шагнасан байна.