“Эрдэнэт үйлдвэр” ХХК-ийн Баяжуулах фабрикийн өргөтгөлийн ажил нь сүүлийн үед хийгдэж байгаагүй томоохон их бүтээн байгуулалт билээ. Энэ үйлдвэрийн 6000 гаруй ажилтны бие, сэтгэл нэгдэж нэг баг болж ажилласны үр дүнд өнөөдөр хүдэр боловсруулах хүчин чадлаа 6 сая тонноор нэмэгдүүлэх боломж бүрдлээ. Энэ үйл явдлыг тохиолдуулан Монгол улсын Ерөнхийлөгчийн 2015 оны зургаадугаар сарын 17-ны 99 тоот зарлигаар Баяжуулах фабрикийн даргын зөвлөх, төслийн удирдагч Рэнцэнгийн .Дэлгэр, Баяжуулах фабрикийн Нунтаглан баяжуулах хэсгийн хөвүүлэн баяжуулагч Раднаагийн Баяр нарыг Монгол улсын аж үйлдвэрийн гавьяат ажилтан цол тэмдгээр шагнасныг Ерөнхийлөгч Ц.Элбэгдорж хүндэтгэлтэйгээр гардуулан өглөө. Мөн Монгол улсын Ерөнхийлөгчийн 2015 оны зургаадугаар сарын 17-ны 100 тоот зарлигаар Барилга засварын цехийн өрлөгчин Н.Амарсайхан, үйлдвэрийн Ерөнхий захирлын нэгдүгээр орлогч И.В.Рой нарыг Хөдөлмөрийн гавьяаны улаан тугийн одонгоор, Зохион бүтээгч инженер Л.Мөнхцэцэг, Баяжуулах фабрикийн ерөнхий инженер В.Н.Макаров нарыг Алтан гадас одонгоор, Засвар механикын заводын ажилтан Э.Мэндхүүг Хөдөлмөрийн хүндэт медалиар, В.А.Михайловичийг “Найрамдал” медалиар тус тус шагнасан юм. Ингэснээр Өөрөө нунтаглах хэсгийн өргөтгөлийн нээлтээр “Эрдэнэт үйлдвэр”-ээс хоёр гавьяат цолтон төрлөө.