Аймгийн ЗДТГ-ын 7035-3511 дугаарын утсанд өнгөрсөн 7 хоногт иргэдээс ирсэн санал хүсэлтээс онцлон мэдээлж байна. -Шанд багийн чиглэлд явж байгаа нийтийн тээврийн микроавтобус орой 16:00 цагаас хойш “Хүлэг” хүнсний захаас цаашаа явахгүй гээд буулгаж байна. Ингэж болохгүй биз дээ. Цаашаа маршрутын дагуу явахгүй байна. Үүнийг анхааралдаа аваад маршрутын дагуу явуулж өгөөч ээ? -11 дүгээр хорооллын “Гэгээ” сургуулийн хашаанд орон сууц барьж байгаа компани хашаагаа зөвшөөрөлгүйгээр хойшоо сунгаж татаад байна. Өмнө нь энд 11 дүгээр хороолол руу явсан авто зам тавигдана гээд зураг төсөл гарсан байсан. Гэтэл хашаагаа сунгаад уг газрыг авч байна. Үүнийг шалгаад арга хэмжээ авч өгнө үү? - 3 дугаар хорооллын Орос цэцэрлэгийн зүүн талын явган хүний замыг сая шинээр хийсэн. Гэтэл нийтэд нь цемент цутгаад дээр нь том том чулуу хийгээд орхисон. Одоо чулуу нь овойгоод гараад ирлээ. Өвөл цас ороход хүн унаж бэртэхээр харагдаж байна. Өргөн байсан явган хүний замыг нарийхан болгоод хаясан. Үүнийг мэргэжлийн хүмүүс нь шалгаж арга хэмжээ аваач. Хажууд байгаа 9 дүгээр сургуулийн тэр хавиар явган хүний замыг ямар сайхан хийж байна. Гэтэл энд бол зүгээр хүний нүдийг хуурсан зүйл хийгээд орхилоо. Үүнийг дахин засуулмаар байна. - Хотын төвд байрладаг ихэнх хувийн газрууд хашаан дотроо нохой уяж маш ихээр тэжээж байна. Энэ нь оршин суугчдын амгалан тайван байдлыг алдагдуулж байгааг анхааралдаа авна уу. Л.Гэрэл