Аймгийн ИТХ-ын тэргүүлэгчдийн ээлжит хуралдаан саяхан боллоо. Энэ удаагийн хуралдаанаар өвөлжилтийн бэлтгэл ажлын талаар тэргүүлэгчид холбогдох албаныханаас асууж тодруулан цаашид авах арга хэмжээний талаар санал гаргасан юм. Өнгөрсөн онд аймгийн ИТХ-ын төлөөлөгчдийн саналаар Эрдэнэт хотын төвд төмс, хүнсний ногоо худалдан борлуулах цэг байгуулан ажиллуулахаар болсон. Үүний дараа аймаг, орон нутгийн төсвөөс ногоочдод зориулан  20 ширхэг майхан худалдан авч өгсөн. Аймгийн ИТХ-ын тэргүүлэгч Д.Чулуунбат саяны хуралдаан дээр дээрх асуудлыг хөндөн тавьж байлаа. Тэрбээр “Өнгөрсөн онд аймгийн ИТХ-аас ногоочдыг майхантай болгоход нь зориулж багагүй хэмжээний мөнгө хөрөнгө батлан гаргаж өгсөн. Гэтэл ажил хийж байгаа нөхдүүд том майхан авах мөнгөөр жижиг майхан авсан. 20х8 хэмжээтэй майхан ав гээд байхад 2х3 харьцаатай майхан авсан. Үнэн ш дээ. Тэр мөнгийг нь яасан бэ. Асуудал мөнгө хөрөнгөндөө байгаа юм биш. Үүний цаанаа ажлын байр энэ тэр гээд яривал өргөн утга агуулгатай ажил явж байгаа юм. Гэтэл та нар ямар майхан авав?.  Үүнийг шалгуулдаг газраар нь шалгуулъя. Арай дэндэж байгаа юм биш үү гэж бухимдсан. Тэргүүлэгч Д.Чулуунбатын асуултад аймгийн Засаг даргын орлогч Д.Энхбат “Манай хөдөө аж ахуйн газрынхан майхны асуудалд оролцоогүй. Төсвийн хөрөнгөөр худалдан авсан майхныг манай нөхдүүд Баян-Өндөр суманд хүлээлгэн өгсөн. Ямар мөнгөөр ямар майхан худалдан авсаныг аймгийн Засаг даргын Тамгын газрын дарга сайн мэдэж байгаа. Тэр хүний хийсэн ажил” гэж хариулсан юм. Эндээс харвал ногоочдын ногоон майхан асуудал үүсгэж мэдэх нь ээ. Н.Төр