Улсын Их Хурлаас Монгол хэлний тухай хуулийг баталж долоодугаар сарын 1-нээс хэрэгжиж байгаа билээ. Харин манай аймгийн удирдлагууд Монгол хэлний хуулийг есдүгээр сарын 1-нээс эхлэн хэрэгжүүлэх болсноо аймгийн Засаг даргын шуурхай дээр ЗДТГ-ын дарга В.Сумъяасүх мэдэгдлээ. Монгол хэлний тухай хууль гарснаар төрийн албан хаагчид алдаагүй ярьж, бичдэг болохоос эхлээд олон шаардлага тулгарч байгаа билээ. Монгол хэлний хуульд зааснаар Монгол бичиг гэдэгт өнөөгийн бидний хэрэглэж байгаа кирил бичгийг, үндэсний монгол бичиг гэдэгт уйгаржин монгол бичгийг, бидний өдөр тутмын хэл ярианд хэрэглэгдэж байгаа хэлийг утга зохиолын монгол хэл хэмээн ойлгоно гэж заасан. Үүний дагуу төрийн албан хаагчдад зориулсан 40 цагийн хичээлийг гаргажээ. Энэхүү 40 цагийн хичээлийг судалсны дараа байгууллагын дарга нараас шалгалт авах болно гэдгээ В.Сумъяасүх дарга анхаарууллаа. 40 цагийн хичээлийн 40 орчим хувийг нь үндэсний монгол бичиг буюу уйгаржин монгол бичиг багтаж байгаа тул дарга нар одооноос эхлэн босоо бичигт суралцах юм байна. Мөн төрийн хэлний зөвлөл, Шинжлэх ухааны академиас гаргасан монгол хэл бичгийн зөв бичих дүрмийг нэг мөр болгох үүднээс гаргасан алдаа засах программыг ч төрийн бүх байгууллагад хүргэж байгаа аж. Есдүгээр сарын 1-нээс эхлэн байгууллага хоорондын болон дарга нарын гаргасан албан тоот, шийдвэрүүд үг үсэг, утга найруулгын алдаагүй гарах ёстой гэдгийг энэ үеэр анхаарууллаа. Аймгийн Засаг даргын дэргэд В.Сумъяасүх даргаар ахлуулсан 9 хүний бүрэлдэхүүнтэй Монгол хэлний бодлогын зөвлөл ажиллахаар болсон бөгөөд зөвлөн туслах үүргийг ч гүйцэтгэх гэнэ. Зөвлөлийн гишүүд энэ сарын 1-нээс эхлэн арилжааны телевизүүдийн үгэн зарын алдаа, утга найруулгыг ч хянах юм байна.