Монголын Үйлдвэрчний эвлэлийн холбооноос ирэх долоо хоногийн даваа гаригт орон даяар цалин хөлс нэмэгдүүлэх шаардлагаар цуглаан зохион байгуулах гэж байна. Энэ цуглааныг манай аймгийн Үйлдвэрчний эвлэлийн холбоо өөрийн байрны гадаа зохион байгуулах юм. Ажил хөдөлмөр эрхэлж байгаа хүн бүрийн эрх ашгийг хамгаалж, цалин хөлсийг нэмэгдүүлэх бодлогыг гол уриагаа болгон ажилладаг МҮЭХ-ны дэд дарга Д.Эрдэнэбат тэргүүтэй удирдлагууд манай аймагт “Нээлттэй хаалганы өдөрлөг”-т оролцож байна. Орхон аймгийн ҮЭХ-ноос энэ өдөр аж ахуйн нэгж байгууллагуудын салбар холбооны ажлын үр дүн, хийсэн бүтээлч ажлыг танилцууллаа. Манай аймгийн Үйлдвэрчний эвлэлийн байгууллагаас “Эрдэнэт Дулааны цахилгаан станц”, “Орхон” цогцолбор, Эрдэнэт Булган цахилгаан түгээх сүлжээ компанийн дэргэдэх салбар хорооны ажил жигдэрсэн байна. Хөдөлмөр эрхэлж байгаа хүний эрх ашгийг хамгаалах нэг хэсэг нь хөдөлмөр хамгаалал, эрүүл ахуйн байдлыг хангасан ажлын байран дээр хөдөлмөр эрхлэх асуудал байдаг. Энэ талаар салбар хороодууд өөрийн ажил мэргэжилд тохируулан ажиллаж байна. Амарын талбайд зохион байгуулж буй ҮЭХ-ны “Нээлттэй хаалганы өдөрлөг”-өөр мэдээлэл, зөвлөгөөг салбар хороодууд хийж байна.