Монгол Оросын найрамдлын өдрүүдийг эрдэнэтчүүд өргөн дэлгэр тэмдэглэн өнгөрүүлдэг. Жил бүр уламжлал болгон зохиогддог Монгол Оросын найрамдлын өдрүүдийн хувьд энэ онд 55 дахь удаагаа зохиогдох гэж байгаа аж. Энэ талаарх  мэдээллийг ОХУ-аас Эрдэнэт хотод суугаа Ерөнхий консул Р.Р.Ракшаев, Эрдэнэт хот дахь Монгол Оросын найрамдлын нийгэмлэгийн тэргүүн Ж.Мажинбуу нар хэвлэлийнхэнд өгч энэ үеэр зохиох ажлынхаа төлөвлөгөөг танилцуулсан юм. Энэ онд 55 дахь жилдээ зохион байгуулагдах Монгол Оросын найрамдлын өдрийн үеэр ОХУ-ын БНТатар улсын дуу бүжгийн чуулгын тоглолт аравдугаар сарын 23-нд Эрдэнэт хотноо болох аж. Найрамдлын өдрүүдийн хүрээнд ерөнхий боловсролын сургуулийн сурагчдын дунд уламжлалт орос хэлний олимпиадыг зохион байгуулахаар төлөвлөжээ. Мөн ОХУ-аас Эрдэнэт хотод суугаа Ерөнхий консулын санаачлагаар ерөнхий боловсролын сургуулийн ахлах ангийн сурагчдын дунд сагсан бөмбөг, гар бөмбөгийн тэмцээнийг аймгийн Боловсрол, соёлын газартай хамтран зохион байгуулах ажээ. Энэ үеэр Ерөнхий консул Р.Р.Ракшаев, Ж.Мажинбуу нар сэтгүүлчдийн сонирхсон асуултад хариулт өглөө.